ଦେଶବାସୀଙ୍କୁ ଉପରାଷ୍ଟ୍ରପତିଙ୍କ ପରାମର୍ଶ: ନିଜ ଧର୍ମଙ୍କୁ ମାନନ୍ତୁ, ଘୃଣା ଭାଷଣରେ ପଡନ୍ତୁ ନାହିଁ

ଥିରୁଭାନନ୍ତପୁରମ୍‌,୩।୧: ଉପରାଷ୍ଟ୍ରପତି ଏମ ଭେଙ୍କେୟା ନାଇଡୁ ଧର୍ମ ଉପରେ ଚାଲିଥିବା ରାଜନୀତିରେ ସୋମବାର ଅସନ୍ତୋଷ ବ୍ୟକ୍ତ କରିଛନ୍ତି। ଦେଶବାସୀଙ୍କୁ ଏକ ବାର୍ତ୍ତା ଦେଇ ସେ କହିଛନ୍ତି, ଅନ୍ୟର ଧର୍ମକୁ ସମାଲୋଚନା କରିବା ଏବଂ ସମାଜରେ ମତଭେଦ ସୃଷ୍ଟି କରିବାର କୌଣସି ପ୍ରୟାସ ହେବା ଉଚିତ୍‌ ନୁହେଁ। ଏହି ଦେଶର ପ୍ରତ୍ୟେକ ବ୍ୟକ୍ତିଙ୍କୁ ତାଙ୍କ ବିଶ୍ୱାସ ଆଧାରରେ ଧର୍ମ ପାଳନ କରିବାକୁ ଅନୁମତି ଦିଆଯାଇଛି।
କେରଳର କ୍ୟାଥୋଲିକ ସମ୍ପ୍ରଦାୟର ଆଧ୍ୟାତ୍ମିକ ନେତା ତଥା ସାମାଜିକ ସଂସ୍କାରକ ସେଣ୍ଟ କୁରିଆକୋସ ଇଲିଆସ ଚଭାରାଙ୍କ ୧୫୦ତମ ବାର୍ଷିକୀ ପାଳନ ପାଇଁ ନିକଟସ୍ଥ ମାନ୍ନାମ ଠାରେ ଆୟୋଜିତ ଏକ କାର୍ଯ୍ୟକ୍ରମରେ ନାଇଡୁ ମୁଖ୍ୟ ଅତିଥି ଭାବରେ ଅଂଶଗ୍ରହଣ କରିଥିଲେ। ଏଠାରେ ସେ କହିଥିଲେ, ଧର୍ମକୁ ସୁରକ୍ଷା ଦିଅ, କିନ୍ତୁ ଘୃଣା ଭାଷଣରେ ପଡନ୍ତୁ ନାହିଁ। ଏଭଳି କାର୍ଯ୍ୟ ଆମ ସଂସ୍କୃତି, ଐତିହ୍ୟ, ପରମ୍ପରା ଏବଂ ସାମ୍ବିଧାନିକ ଅଧିକାର ବିରୁଦ୍ଧ ଅଟେ। ଧର୍ମନିରପେକ୍ଷତା ପ୍ରତ୍ୟେକ ଭାରତୀୟଙ୍କ ରକ୍ତରେ ଅଛି ଏବଂ ଏହାର ସଂସ୍କୃତି ଏବଂ ଐତିହ୍ୟ ହେତୁ ସମଗ୍ର ବିଶ୍ୱରେ ଭାରତ ସମ୍ମାନିତ ହୋଇଛି। ସରକାରୀ ଏବଂ ବେସରକାରୀ ବିଦ୍ୟାଳୟରେ ପଢୁଥିବା ଛାତ୍ରମାନଙ୍କ ପାଇଁ ସମ୍ପ୍ରଦାୟ ସେବା ବାଧ୍ୟତାମୂଳକ କରାଯିବା ଉଚିତ ବୋଲି ସେ କହିଛନ୍ତି।