ନୂଆଦିଲ୍ଲୀ,୧୧।୨ : କରୋନା ସଂକ୍ରମଣକୁ ରୋକିବାରେ ନାଇଟ୍ରିକ ଅକ୍ସାଇଡ ଥିବା ନାଜାଲ ସ୍ପ୍ରେର କୌଣସି ଉପଯୁକ୍ତ ପ୍ରମାଣ ମିଳିନାହିଁ। ପର୍ଯ୍ୟାପ୍ତ ପ୍ରମାଣ ଅଭାବରୁ ଭାରତୀୟ ବଜାରରେ ଏହି ନାଜାଲ ସ୍ପ୍ରେ ବିକ୍ରୟ କରିବାକୁ ସରକାରଙ୍କ ବିଶେଷଜ୍ଞ କମିଟି ଅନୁମତି ଦେଇନାହିଁ।
ସୂଚନାନୁସାରେ, ଫାର୍ମା କମ୍ପାନୀ ଗ୍ଲେନମାର୍କ ଫାର୍ମାସ୍ୟୁଟିକାଲ୍ସ ନାଇଟ୍ରିକ ଅକ୍ସାଇଡ ଥିବା ଏକ ନାଜାଲ ସ୍ପ୍ରେ ଲଞ୍ଚ କରିବାକୁ ଚାହୁଁଛି, ଯାହା କରୋନା ସଂକ୍ରମଣକୁ ରୋକିବାରେ ପ୍ରଭାବଶାଳୀ ବୋଲି କୁହାଯାଉଛି। ଗତ ବର୍ଷ ନଭେମ୍ବର ମାସର ବୈଠକରେ ବିଶେଷଜ୍ଞ କମିଟି ଉତ୍ପାଦ ଉପରେ ପ୍ରଶ୍ନ ଉଠାଇ କମ୍ପାନୀଠାରୁ କିଛି ପ୍ରମାଣ ମାଗିଥିଲେ ମଧ୍ୟ କମିଟି ନିଷ୍ପତ୍ତି ନେଇଛି ଯେ ଏହି ନାଜାଲ ସ୍ପ୍ରେକୁ କୋଭିଡ ୧୯ ର ସୁରକ୍ଷା ଭାବରେ ବ୍ୟବହାର କରାଯାଇପାରିବ ନାହିଁ।
କମିଟିର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଗ୍ଲେନମାର୍କ ଦ୍ୱାରା ନାଇଟ୍ରିକ ଅକ୍ସାଇଡ ଥିବା ନାଦ୍ଜାଲ ସ୍ପ୍ରେ ଶରୀରରେ କରୋନା ସଂକ୍ରମଣକୁ ରୋକିବାରେ ସହାୟକ ହୋଇଥାଏ ବୋଲି କମ୍ପାନୀ ପକ୍ଷରୁ କୁହାଯାଇଥିଲା। ତେବେ ଯେତେବେଳେ ଉତ୍ପାଦ ସହିତ ଜଡିତ ବୈଜ୍ଞାନିକ ତଥ୍ୟ ଏବଂ ଅନ୍ୟାନ୍ୟ ପ୍ରମାଣ ସମୀକ୍ଷା କରାଯାଇଥିଲା, ସେଗୁଡ଼ିକ ସନ୍ତୋଷଜନକ ନ ଥିଲା।।
