ବେଙ୍ଗାଲୁରୁ, ୨୪।୬: କୋଭିଡ୍ ଟିକାକୁ ନେଇ କେତେକଙ୍କ ମଧ୍ୟରେ ରହିଥିବା କୁଣ୍ଠାବୋଧ ଦୂର କରିବା ଓ ଟିକାକରଣ ଅଭିଯାନରେ ବହୁସଂଖ୍ୟାରେ ସାମିଲ ହେବାକୁ ପ୍ରୋତ୍ସାହିତ କରିବା ଲାଗି ବିଭିନ୍ନ କମ୍ପାନୀ ପକ୍ଷରୁ ରିହାତି ଘୋଷଣା କରାଯାଇଛି। ଯେଉଁମାନେ କୋଭିଡ୍ ଟିକାର ଡବଲ ଡୋଜ୍ ନେଇଛନ୍ତି, ସେମାନଙ୍କୁ ଇଣ୍ଡିଗୋ ଏୟାରଲାଇନ୍ସ ମୂଳ ଭଡ଼ାରେ ୧୦ ପ୍ରତିଶତ ରିହାତି ଦେବ ବୋଲି କହିଛି। ସେହିପରି ଫାଷ୍ଟଫୁଡ୍ କମ୍ପାନୀ ମାକ୍ଡୋନାଲ୍ଡର ଭାରତୀୟ ଶାଖା ମିଲ୍ ଉପରେ ୨୦% ରିହାତି ଦେଉଛି। ହୋମ୍ ଆପ୍ଲିଆନ୍ସ ନିର୍ମାତା ଗଡ୍ରେଜ ଟିକା ନେଇଥିବା ଗ୍ରାହକମାନଙ୍କୁ ଏହାର ଉତ୍ପାଦ ଉପରେ ଅଧିକ ଓ୍ବାରେଣ୍ଟି ଦେଉଛି। ଏଥିପାଇଁ ଗ୍ରାହକଙ୍କୁ ଟିକା ସାର୍ଟିଫିକେଟ ଦେଖାଇବାକୁ ହେବ। ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ ଅନୂ୍ୟନ ଗୋଟିଏ ଡୋଜ୍ ଟିକା ନେଇଥିବା ଏହାର ଗ୍ରାହକମାନଙ୍କୁ ଜମାରାଶି ଉପରେ ଅଧିକ ସୁଧ ଦେଉଛି। ଏହା ସତ୍ତ୍ୱେ ଭାରତରେ ଟିକାଦାନ ହାର ଯଥେଷ୍ଟ କମ୍ ରହିଛି। ବର୍ତ୍ତମାନ ସୁଦ୍ଧା ମାତ୍ର ୨୯ କୋଟିରୁ ସାମାନ୍ୟ ଅଧିକ ଡୋଜ୍ ଦିଆଯାଇଛି।