ପ୍ରତ୍ୟେକ କମ୍ପାନୀର ନିଜସ୍ବ ନୀତି ରହିଛି। କମ୍ପାନୀ କିପରି ଏହାର କର୍ମଚାରୀଙ୍କ ଯତ୍ନ ନେବ ସେ ସମ୍ପର୍କରେ ସ୍ଥିର କରିଥାଏ। କିଛି କମ୍ପାନୀ କର୍ମଚାରୀଙ୍କୁ ବୋନସ, ଛୁଟିଦିନ ଅଫର୍ କିମ୍ବା ଖାଦ୍ୟ ଏବଂ ମାର୍କେଟିଂ କୁପନ ଦିଅନ୍ତି, ଆଉ କିଛି କମ୍ପାନୀ କର୍ମଚାରୀଙ୍କ ବିବାହ ପାଇଁ ମଧ୍ୟ ଦାୟିତ୍ୱ ଗ୍ରହଣ କରିଥାନ୍ତି। ତେବେ ବର୍ତ୍ତମାନ ସମୟରେ ଇଂଲଣ୍ଡର ଏକ କମ୍ପାନୀ ଏହାର ସ୍ବତନ୍ତ୍ର ଏକ ନୀତି ଯୋଗୁ ଚର୍ଚ୍ଚାରେ ରହିଛି। କର୍ମଚାରୀଙ୍କୁ ନଗଦ ଦରମା ବଦଳରେ ‘ସୁନା’ ପ୍ରଦାନ କରୁଛି ଉକ୍ତ କମ୍ପାନୀ।
‘ଟେଲିମନି’ ନାମକ ଏକ କମ୍ପାନୀ ଏହାର କର୍ମଚାରୀମାନଙ୍କୁ ଭିନ୍ନ ଢଙ୍ଗରେ ଯତ୍ନ ନେଉଛି। ନଗଦ ଦରମା ବଦଳରେ କର୍ମଚାରୀଙ୍କୁ ‘ସୁନା’ ପ୍ରଦାନ କରୁଛି। ଏହା ପଛରେ କମ୍ପାନୀର ସିଇଓ କ୍ୟାମେରନ ପ୍ୟାରୀଙ୍କର ନିଜସ୍ବ ଚିନ୍ତାଧାରା ରହିଛି। ଯାହାକୁ ସେ କର୍ମଚାରୀଙ୍କ ଦୃଷ୍ଟିରୁ ଠିକ୍ ବୋଲି ବିବେଚନା କରିଛନ୍ତି।
ଇଂଲଣ୍ଡର ‘ଟେଲିମନି’ କମ୍ପାନୀ ଆର୍ଥିକ ସେବା ଯୋଗାଏ। କର୍ମଚାରୀଙ୍କ ବର୍ତ୍ତମାନ ଏବଂ ଭବିଷ୍ୟତକୁ ଧ୍ୟାନରେ ରଖି ସେ ସେମାନଙ୍କୁ ଦରମା ବଦଳରେ ସୁନା ନେବାକୁ ଅଫର୍ କରୁଛି। ବର୍ତ୍ତମାନ, କମ୍ପାନୀର ବରିଷ୍ଠ ପଦବୀରେ ଥିବା ୨୦ ଜଣଙ୍କୁ ଏହି ନୀତିର ସୁବିଧା ଦିଆଯାଇଛି। ଯଦି ଏହି ବ୍ୟବସ୍ଥାରେ କର୍ମଚାରୀଙ୍କ ସୁବିଧା ଦେଖାଯାଏ, ତେବେ କମ୍ପାନୀ ବାକି ଲୋକଙ୍କ ପାଇଁ ସମାନ ନୀତି ଆପଣାଇବ। ତଥାପି ଏହି ନୂତନ ବେତନ ନୀତିର ଏବେ ବି ପରୀକ୍ଷା ଚାଲିଛି। ପ୍ୟାରୀ କହିଛନ୍ତି, କରୋନା ଯୋଗୁ ଅବସ୍ଥା ଆହୁରି ଖରାପ ହୋଇଛି। ଏଭଳି ପରିସ୍ଥିତିରେ କର୍ମଚାରୀଙ୍କୁ ପାଉଣ୍ଡରେ ଦରମା ଦେବାର କୌଣସି ଲାଭ ନାହିଁ। କାରଣ ଏହାର ମୂଲ୍ୟ ହ୍ରାସ ପାଉଛି।
ସେ ଆହୁରି ମଧ୍ୟ କହିଛନ୍ତି, ପାଉଣ୍ଡର ଅବନତି ପରେ ମଧ୍ୟ ଯଦି ସୁନାରେ ବିନିଯୋଗ ହୁଏ, ତେବେ ଏହା କର୍ମଚାରୀମାନଙ୍କୁ ସର୍ବଦା ମୁଦ୍ରାସ୍ଫୀତିଠାରୁ ଆଗରେ ରଖିବ। ଏଭଳି ପରିସ୍ଥିତିରେ କମ୍ପାନୀ କେବଳ କର୍ମଚାରୀମାନଙ୍କୁ ଆର୍ଥିକ ସଙ୍କଟରୁ ରକ୍ଷା କରିବା ପାଇଁ ‘ସୁନା’ ଦେବା ନୀତି ଆରମ୍ଭ କରିଛି। ସେମାନେ ନଗଦ ଦରମା କିମ୍ବା ସୁନା ନେବାକୁ ଚାହୁଁଛନ୍ତି କି ନାହିଁ ତାହା ସମ୍ପୂର୍ଣ୍ଣ ଭାବେ କର୍ମଚାରୀଙ୍କ ହାତରେ ରହିବ। ‘ଟେଲିମନି’ର ଏହି ନୂତନ ନୀତି ସୋସିଆଲ ମିଡିଆରେ ଖୁବ୍ ଚର୍ଚ୍ଚା। ଯେଉଁ କମ୍ପାନୀ ଆର୍ଥିକ ସଙ୍କଟର ମୁକାବିଲା କରିବାକୁ ଯୋଜନା କରିଛି ଏବଂ ଏହାର କର୍ମଚାରୀମାନଙ୍କ ବିଷୟରେ ମଧ୍ୟ ଚିନ୍ତା କରୁଛି ସେପରି କମ୍ପାନୀକୁ ଚାରିଆଡୁ ପ୍ରଶଂସାର ସୁଅ ଛୁଟୁଛି।