ରସୁଲପୁର,୪ା୧୨(ଡି.ଏନ.ଏ.): ରସୁଲପୁର ବ୍ଲକ୍ ଅଞ୍ଚଳରେ ଗତ ଅଗଷ୍ଟ ବନ୍ୟାରେ କ୍ଷତିଗ୍ରସ୍ତ ହୋଇଥିବା ଧାନଚାଷୀଙ୍କୁ ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ମିଳିବ ସହାୟତା। ଏନେଇ ବ୍ଲକ ଅଞ୍ଚଳରେ କ୍ଷେତ୍ର ସର୍ବେକ୍ଷଣ କାର୍ଯ୍ୟ ଆରମ୍ଭ ହୋଇଛି। ତେବେ ଏହି ବୀମାରାଶି ୨୦୨୧ ଜୁଲାଇରେ ମିଳିବା ସମ୍ଭାବନା ବୋଲି ବ୍ଲକ କୃଷି ଅଧିକାରୀ ଭାଗ୍ୟଧର ସାହୁ ପ୍ରକାଶ କରିଛନ୍ତି। ଫଳରେ ଏହାକୁ ନେଇ ଚାଷୀଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। କାରଣ ସହାୟତା ପ୍ରଦାନ ପାଇଁ ଅନୁନ୍ୟ ବର୍ଷେ ଲାଗିଯାଉଛି। ଅର୍ଥାତ୍ ୨୦୨୦-୨୧ କୃଷି ବର୍ଷ ଖରିଫ ଋତୁର କ୍ଷତି ଭରଣା ୨୦୨୧-୨୨ ବର୍ଷ ଖରିଫରେ ମିଳିବାକୁ ଚାଷୀ ସହଜରେ ଗ୍ରହଣ କରିପାରୁନାହାନ୍ତି। ଚାଷୀ ଋଣ କରି ଚାଷ କରୁଥିବାରୁ କ୍ଷତିଗ୍ରସ୍ତ ହେଉଛନ୍ତି। ତେବେ ଫସଲ ବୀମା ସହାୟତା ପ୍ରଦାନରେ ବିଳମ୍ବ କରାଯାଉଥିବାରୁ ଏହି ଅବିଧି ମଧ୍ୟରେ ଋଣ ଉପରୁ ସୁଧ ଛାଡ କରାଯିବା
ପାଇଁ ଚାଷୀଙ୍କ ପକ୍ଷରୁ ଦାବି କରାଯାଉଛି।
ବ୍ଲକର ୨୮ ପଞ୍ଚାୟତରେ ୩ଟି ବିଭାଗ ପକ୍ଷରୁ ସର୍ବେକ୍ଷଣ ଆରମ୍ଭ ହୋଇଛି। ସେଥିମଧ୍ୟରୁ ତହସିଲ ପକ୍ଷରୁ ୧୫, କୃଷି ବିଭାଗ ପକ୍ଷରୁ ୬ ଓ ପରିସଂଖ୍ୟାନ ବିଭାଗ ପକ୍ଷରୁ ୭ ପଞ୍ଚାୟତରେ ଧାନ ଫସଲର ଅମଳକୁ ଯାଞ୍ଚ କରାଯାଉଛି। ରସୁଲପୁର ତହସିଲଦାର ଜ୍ୟୋତିକାନ୍ତ ଭୁଜବଳ, ସୁପରଭାଇଜର ମହେଶ୍ୱର ସେଠୀ, ରାଜସ୍ବ ନିରୀକ୍ଷକ ଓ ବୀମା ଅଧିକାରୀ କ୍ଷେତକୁ ଯାଇ ସ୍ଥିତି ଯାଞ୍ଚ କରିଛନ୍ତି। ଚଳିତ ମାସ ଶେଷ ସୁଦ୍ଧା ରିପୋର୍ଟ ପ୍ରଦାନ କରାଯିବ ବୋଲି ସର୍ବେକ୍ଷଣ ଦାୟିତ୍ୱରେ ଥିବା ଅଧିକାରୀଙ୍କଠାରୁ ସୂଚାନା ମିଳିଛି।