ଭୁବନେଶ୍ୱର,୧୧।୪(ବ୍ୟୁରୋ): ଶ୍ରୀକ୍ଷେତ୍ରରେ ନବନିର୍ମିତ ଶ୍ରୀଜଗନ୍ନାଥ ମେଡିକାଲ କଲେଜ ସୋମବାର ଲୋକାର୍ପଣ ହେବ। ଏହାର ଅବ୍ୟବହିତ ପୂର୍ବରୁ ଶ୍ରେୟ ନେବାକୁ ଶାସକ ବିଜେଡି ଏବଂ ଭାଜପା ମଧ୍ୟରେ ରାଜନୀତି ଆରମ୍ଭ ହୋଇଯାଇଛି। ଉଦ୍ଘାଟନୀ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସୌଜନ୍ୟମୂଳକ ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆମନ୍ତ୍ରଣ କରିବା କଥା ବୋଲି ଭାଜପା ରାଷ୍ଟ୍ରୀୟ ମୁଖପାତ୍ର ସମ୍ବିତ୍ ପାତ୍ର ଟୁଇଟ୍ କରିବା ପରେ ଏହାର ଉତ୍ତର ରଖିଛନ୍ତି ବିଜେଡିର ବରିଷ୍ଠ ନେତା ଦେବୀ ମିଶ୍ର। ସେ କହିଛନ୍ତି ବିଜୁ ଜନତା ଦଳ କେବେ ଶ୍ରେୟ ରାଜନୀତିରେ ବିଶ୍ୱାସ କରେନାହିଁ। ଦୁଇ ନେତାଙ୍କ ଟୁଇଟ୍ ଯୁଦ୍ଧ ମଧ୍ୟରେ ପୁରୀ ଏମ୍ପି ପିନାକୀ ମିଶ୍ର କେନ୍ଦ୍ରୀୟ ଅନୁଦାନ ସମ୍ପର୍କିତ ତଥ୍ୟ ରଖିଛନ୍ତି। ସେ ସମ୍ବିତ୍ଙ୍କ ଟୁଇଟ୍କୁ ରିଟୁଇଟ୍ କରି କହିଛନ୍ତି, ମେଡିକାଲ କଲେଜରେ ହୋଇଥିବା ମୋଟ ଖର୍ଚ୍ଚର ୧୭.୮% କେନ୍ଦ୍ରୀୟ ଅନୁଦାନ। ମେଡିକାଲ କଲେଜର ଶ୍ରେୟ ନେବାକୁ ରାଜ୍ୟ-କେନ୍ଦ୍ର ମଧ୍ୟରେ ଏଭଳି ପ୍ରତିଦ୍ୱନ୍ଦ୍ୱିତା ଆଞ୍ଚଳିକ ରାଜନୀତିକୁ ସରଗରମ କରିଛି।
ଭାଜପା ମୁଖପାତ୍ର ସମ୍ବିତ୍ ଟୁଇଟ୍ରେ ଉଲ୍ଲେଖ କରିଛନ୍ତି ଯେ, କେନ୍ଦ୍ରୀୟ ଯୋଜନାରେ ଦେଶର ବିଭିନ୍ନ ରାଜ୍ୟରେ ଆରମ୍ଭ ହେଉଥିବା ମେଡିକାଲ କଲେଜ ପ୍ରକଳ୍ପ ଉଦ୍ଘାଟନ କିମ୍ବା ଶିଳାନ୍ୟାସ ବେଳେ ସମ୍ପୃକ୍ତ ରାଜ୍ୟ ସରକାରଙ୍କ ପକ୍ଷରୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟକୁ ତୁରନ୍ତ ଅବଗତ କରିବା ଉଚିତ। ଏ ନେଇ କେନ୍ଦ୍ର ସ୍ବାସ୍ଥ୍ୟ ସଚିବ ସମସ୍ତ ରାଜ୍ୟର ମୁଖ୍ୟ ସଚିବମାନଙ୍କୁ ଚିଠି ଲେଖିଥିଲେ। ଉକ୍ତ ଚିଠିକୁ ସମ୍ବିତ୍ ଟ୍ୟାଗ୍ କରିଛନ୍ତି। ମେଡିକାଲ କଲେଜ ପ୍ରତିଷ୍ଠା ଲାଗି କେନ୍ଦ୍ର ପାଣ୍ଠି ଯୋଗାଉଥିବା ବିଷୟ ସମ୍ବିତ ସିଧାସଳଖ ଚିଠି ମାଧ୍ୟମରେ ଦର୍ଶାଇଛନ୍ତି। ତେଣୁ ଶ୍ରୀଜଗନ୍ନାଥ ମେଡିକାଲ କଲେଜକୁ କେନ୍ଦ୍ର ଯୋଜନା ଅନ୍ତର୍ଗତ ବୋଲି ପ୍ରମାଣିତ କରିବା ଏବଂ ଲୋକଙ୍କ ମନରେ ଏହି ଧାରଣା ସୃଷ୍ଟି କରିବାକୁ ସେ ଉଦ୍ୟମ କରୁଛନ୍ତି ବୋଲି ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି। ତେବେ ସମ୍ବିତ୍ଙ୍କ ଏହି ଟୁଇଟ୍ ପରେ ବରିଷ୍ଠ ବିଜେଡି ନେତା ଦେବୀ ମିଶ୍ର କହିଛନ୍ତି, ସାରା ଭାରତବର୍ଷ ଜାଣିଛି ନବୀନ ପଟ୍ଟନାୟକ ନିଜ ଢୋଲ ନିଜେ ପିଟିବାକୁ ବିଶ୍ୱାସ କରନ୍ତି ନାହିଁ। ଯଦି ଓଡ଼ିଶାର ଅଭିବୃଦ୍ଧି ହେଉଛି, ତାହା ହେଲା ପ୍ରାଥମିକତା ବୋଲି ଦେବୀ କହିଛନ୍ତି। ଅନ୍ୟପଟେ ଏମ୍ପି ପିନାକୀ ମିଶ୍ର କହିଛନ୍ତି, ପୁରୀ ମେଡିକାଲ କଲେଜ ଲାଗି ମୋଟ ୬୩୪ କୋଟି ଟଙ୍କା ଖର୍ଚ୍ଚ ହୋଇଛି। ସେଥିରୁ କେନ୍ଦ୍ର ସରକାର ୧୧୩ କୋଟି ଟଙ୍କା ଖର୍ଚ୍ଚ କରିଛନ୍ତି, ଯାହା ମୋଟ ଖର୍ଚ୍ଚର ୧୭.୮ ପ୍ରତିଶତ। କେନ୍ଦ୍ର ଦେଇଥିବା ଅର୍ଥ ପାଇଁ ରାଜ୍ୟବାସୀ ଖୁସି। ନିୟମାନୁଯାୟୀ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀଙ୍କୁ ନିମନ୍ତ୍ରଣ କରାଯାଇଛି ବୋଲି ସେ କହିଛନ୍ତି।
ଅନ୍ୟପଟେ ସୋମବାର ମେଡିକାଲ କଲେଜର ଲୋକାର୍ପଣ ହେବାକୁ ଥିବାରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ମେଡିକାଲ କଲେଜର ପ୍ରଥମ ବ୍ୟାଚ୍ ପାଇଁ ଏମ୍ବିବିଏସ୍ ଛାତ୍ରୀଛାତ୍ରଙ୍କ ଆଡମିଶନ ଶେଷ ହୋଇଛି। ପୁରୀ ଭଳି ଏକ ଅନ୍ତର୍ଜାତୀୟ ପର୍ଯ୍ୟଟନ ସ୍ଥଳୀରେ ଏଭଳି ମେଡିକାଲ କଲେଜ ସ୍ଥାପନ କରାଯାଇଥିବାରୁ ଏହାକୁ ନେଇ ଛାତ୍ରୀଛାତ୍ର, ଅଭିଭାବକ ଓ କଲେଜ କର୍ତ୍ତୃପକ୍ଷ ଉତ୍ସାହିତ ଅଛନ୍ତି। ପୁରୀ-କୋଣାର୍କ ରାସ୍ତାର ବାଲିଗୁଆଳିଠାରେ ସ୍ଥାପିତ ହୋଇଥିବା ଶ୍ରୀଜଗନ୍ନାଥ ମେଡ଼ିକାଲ କଲେଜରେ ସୋମବାରଠାରୁ ପ୍ରଥମ ବ୍ୟାଚ୍ ଏମ୍ବିବିଏସ୍ ପାଠ୍ୟକ୍ରମ ଆରମ୍ଭ ହେବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗଦେଇ ଛାତ୍ରୀଛାତ୍ରଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଭର୍ଚୁଆଲ ମୋଡ୍ରେ ଏହି କାର୍ଯ୍ୟକ୍ରମରେ ଯୋଗଦେବେ।