ଫୁଲବାଣୀ/ଦାରିଙ୍ଗବାଡ଼ି,୧୧ା୧୨(ରାକେଶ କୁମାର ରାଉତ/ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ଥାନା ଅଞ୍ଚଳରେ ଚୋରାମଦ କାରବାର ବୃଦ୍ଧି ପାଇଛି। ଅଞ୍ଚଳରେ ପୋଲିସ, ଅବକାରୀ ବିଭାଗ ପକ୍ଷରୁ କୌଣସି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଅଭିଯୋଗ ହୋଇଛି। ବିଶେଷକରି ଉକ୍ତ ଅଞ୍ଚଳର ଅଲାଞ୍ଜୁରୀ ଏବଂ ବ୍ରାହ୍ମଣୀଗାଁରେ ୫୦ରୁ ଊର୍ଦ୍ଧ୍ୱ ପରିବାର ଚୋରା ଦେଶୀ ମଦ ଅବାଧରେ ବିକ୍ରି କରି ଅଞ୍ଚଳରେ ବିଶୃଙ୍ଖଳା ସୃଷ୍ଟି କରୁଛନ୍ତି। ଅନେକ ଗରିବ ଶ୍ରେଣୀର ଲୋକ ଆହୁରି ଗରିବ ଅବସ୍ଥାକୁ ଚାଲିଯାଉଛନ୍ତି। ଏହାର ମୁଖ୍ୟ କାରଣ ଅଞ୍ଚଳରେ ଅବାଧରେ ଦେଶୀ ମଦ ବିକ୍ରି ଯୋଗୁ ଅଞ୍ଚଳରେ ଲୋକଙ୍କ ସ୍ବାସ୍ଥ୍ୟ ହାନି ହେବା ସହ ସେମାନଙ୍କ ଆର୍ଥିକ ପରିସ୍ଥିତି ବିଗିଡ଼ି ଯାଉଛି। ସେହିପରି ମଦ୍ୟପଙ୍କ ଦୌରାତ୍ମ୍ୟରୁ ବିଦ୍ୟାଳୟ, କଲେଜକୁ ଯାଉଥିବା ଛାତ୍ରୀଛାତ୍ରଙ୍କ ପାଇଁ ସମସ୍ୟା ହେଉଛି।
ଏହାର ସମାଧାନ ପାଇଁ ରାଜ୍ୟ ଅବକାରୀ ବିଭାଗୀୟ ମନ୍ତ୍ରୀ, କନ୍ଧମାଳ ଜିଲାପାଳ, ଏସ୍ପିଙ୍କ ସମେତ ଅବକାରୀ ବିଭାଗ ଓ ସ୍ଥାନୀୟ ପୋଲିସ ନିକଟରେ ଲିଖିତ ଅଭିଯୋଗ କରିଥିଲେ ମଧ୍ୟ ଅଞ୍ଚଳରେ ଚୋରାମଦ କାରବାର ରୋକିବାରେ କେହି ପଦକ୍ଷେପ ନେଉ ନ ଥିବା ମଦ ବନ୍ଦ ଅଭିଯାନ କମିଟିର ସଭାନେତ୍ରୀ ସଂଜିତା ମନ୍ତ୍ରୀଙ୍କ ସମେତ ଉପସଭାନେତ୍ରୀ ସୁଭଦ୍ରା ସିଂ ପ୍ରମୁଖ ଅଭିଯୋଗ କରିଛନ୍ତି। ଅଭିଯୋଗ କରିବାର ୧ ମାସ ବିତିଯାଇଥିଲେ ମଧ୍ୟ ଜିଲା ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବାରୁ ଅଞ୍ଚଳରେ ଆହୁରି ଅଶାନ୍ତିର ବାତାବରଣ ସୃଷ୍ଟି ହୋଉଛି। ଫଳରେ ପୁଣି ବୁଧବାର ମଦ ବନ୍ଦ ଅଭିଯାନର ସଭାନେତ୍ରୀଙ୍କ ନେତୃତ୍ୱରେ ଉପସଭାନେତ୍ରୀ, ସମ୍ପାଦିକା ତନୁଶ୍ରୀ ମାଳବିଶୋଇ, ସାରମାଙ୍ଗା ମାଝୀ, କାଡାମାଙ୍ଗା ମାଝୀ, ଅଞ୍ଜନା ସିଂ, ସଂଯୁକ୍ତା ସିଂ ପ୍ରମୁଖ କନ୍ଧମାଳ ଜିଲାପାଳଙ୍କୁ ଅଭିଯୋଗ କରିବାକୁ ଯାଇଥିବା କହିଛନ୍ତି।
