ନୂଆଦିଲ୍ଲୀ,୯ା୪(ପି.ଟି.): ଭାରତୀୟ ଅଲିମ୍ପିକ୍ସ ଆସୋସିଏଶନ୍ (ଆଇଓଏ) ସଭାପତି ପି.ଟି. ଉଷା ଏକ ସଙ୍ଗିନ ଅଭିଯୋଗ ଆଣିଛନ୍ତି। ଆଇଓଏ କାର୍ଯ୍ୟନିର୍ବାହୀ ପରିଷଦର ସଦସ୍ୟ ମାନେ ତାଙ୍କୁ ସାଇଡ୍ ଲାଇନ୍ କରିବାକୁ ପ୍ରୟାସ କରୁଥିବା ନେଇ ଉଷା ସୋମବାର ଅଭିଯୋଗ ଆଣିଛନ୍ତି। ଏପରି କି ତାଙ୍କ ଦ୍ୱାରା ନିଯୁକ୍ତ ଅଫିସିଆଲଙ୍କୁ ଟର୍ମିନେସନ ଲେଟର ଦିଆଯାଇଥିବା ସେ କହିଛନ୍ତି। ଶୁକ୍ରବାର ଆଇଓଏର କାର୍ଯ୍ୟନିର୍ବାହୀ ପରିଷଦ ବୈଠକରେ ୯ ସଦସ୍ୟ ଏକ ନୋଟିସ୍ ପାରିତ କରିଥିଲେ। ଅନଧିକୃତ ବ୍ୟକ୍ତିଙ୍କ ଆଇଓଏ ମୁଖ୍ୟାଳୟ ପ୍ରବେଶ ଉପରେ କଟକଣା ପାଇଁ ଏହି ନୋଟିସ୍ ଉଦ୍ଦିଷ୍ଟ ଥିଲା। ଦୁଇ ଜଣ ନବନିଯୁକ୍ତ ଅଧିକାରୀଙ୍କ ପାଇଁ ଏହା ଉଦ୍ଦିଷ୍ଟ ଥିବାରୁ ଉଷା ଏହାକୁ ନିନ୍ଦା କରିଛନ୍ତି। ଜାନୁଆରୀ ମାସରେ ଆଇଓଏର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଭାବରେ ରଘୁରାମ ଆୟରଙ୍କୁ ଓ ଅଜୟ ନାରଙ୍ଗଙ୍କୁ ଉଷାଙ୍କ ସହକାରୀ ଭାବେ ନିଯୁକ୍ତି ମିଳିଥିଲା। ଉଭୟଙ୍କ ଟର୍ମିନେସନ ପାଇଁ କାର୍ଯ୍ୟନିର୍ବାହୀ ପରିଷଦ ସଦସ୍ୟମାନେ ନିଷ୍ପତ୍ତି ନେଇଥିବା ବେଳେ ଏହାକୁ ଆଇନତଃ ଅବୈଧ ବୋଲି କହିଛନ୍ତି ଉଷା।
ଆଇଓଏର ସଦସ୍ୟମାନେ ଗୋଟିଏ ଟିମ୍ ଭାବରେ କାମ ନ କରିପାରିବା ଅତ୍ୟନ୍ତ ଦୁଃଖଦାୟକ। ମୋତେ ସାଇଡ୍ ଲାଇନ୍ କରିବା ପାଇଁ ଏଭଳି ପ୍ରୟାସ ମଧ୍ୟ ଚିନ୍ତାଜନକ। ଆଇଓଏର ଦୈନନ୍ଦିନ କାର୍ଯ୍ୟ ପରିଚାଳନା କାର୍ଯ୍ୟନିର୍ବାହୀ ପରିଷଦର ଦାୟିତ୍ୱ ନୁହେଁ। କାହାକୁ ନିଯୁକ୍ତି ଦିଆଯିବ ଓ କାହାକୁ କଢ଼ାଯିବ ଏହା ଉପରେ କାର୍ଯ୍ୟନିର୍ବାହୀ ପରିଷଦ ଧ୍ୟାନ ରଖିବା ସବୁଠାରୁ ଦୁର୍ଭାଗ୍ୟଜନକ। ଆଇଓଏକୁ ଏକ ନୂତନ ଶିଖରରେ ପହଞ୍ଚାଇବା ପାଇଁ କାର୍ଯ୍ୟନିର୍ବାହୀ ପରିଷଦର ସଦସ୍ୟମାନେ ଚେଷ୍ଟା କରିବା ଉଚିତ ବୋଲି କହିଛନ୍ତି ଉଷା। ଆଇଓଏର ଅନ୍ତର୍ଦ୍ୱନ୍ଦ୍ୱ ଜାନୁଆରୀ ମାସରୁ ପଦାରେ ପଡ଼ିଥିଲା। ପ୍ୟାରିସ୍ ଅଲିମ୍ପିକ୍ସକୁ ମାତ୍ର ୩ ମାସ ବାକି ରହିଥିବା ବେଳେ ଏଭଳି ଗୋଡ଼ଟଣା ନୀତି ଆମକୁ କ୍ଷତି ପହଞ୍ଚାଇବ ବୋଲି ଉଷା କହିଛନ୍ତି।