ପୁରୁଷୋତ୍ତମପୁର,୨୭/୧୨(ଡିଏନ୍ଏ) ଗଞ୍ଜାମ ଜିଲା ପୁରୁଷୋତ୍ତମ ପୁର ସହର ଉପକଣ୍ଠରେ ରାଧାକୃଷ୍ଣ ମହାପ୍ରଭୁବିଜେ ନାମରେ ଥିବା ପ୍ରାୟ ଏକ ଏକରରୁ ଉର୍ଦ୍ଧ ଜମିକୁ ଜମି ମାଫିଆ ମାନେ କବଜା କରିନେଇଥିବା ଅଭିଯୋଗ ହୋଇଛି । ଏହି ଜମିକୁ ଜୈନିକ ବ୍ୟକ୍ତି ତହସିଲରେ କୁଆଡେ ନିଜ ନାମରେ ପଟ୍ଟା କରାଇ ନେଇଥିଲେ। ଯାହାକି ସେହି ଜମିକୁ ଗତ କିଛିଦିନ ତଳେ ବିକ୍ରି ମଧ୍ୟ କରିଛନ୍ତି। ଏଥିନେଇ ପୁରୁଷୋତ୍ତମପୁର ସବରେଜିଷ୍ଟରଙ୍କ କାର୍ଯ୍ୟାଳୟରେ କୁଆଡେ ଭିତିରିଆ ଭାବେ ରେଜିଷ୍ଟ୍ରେଶନ ମଧ୍ୟ ହୋଇଥିବା ନେଇ ଅଭିଯୋଗ ହୋଇଛି । ଏହି ଘଟଣା ଲୋକ ଲୋଚନକୁ ଆସିବା ପରେ ଏହା ଏଠାରେ ଚର୍ଚ୍ଚାର ବିଷୟ ପାଲଟିଛି।
ଏହାକୁ ନେଇ ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି । ଏହି ଘଟଣାକୁନେଇ କିଛି ବ୍ୟକ୍ତି ଗଞ୍ଜାମ ଜିଲ୍ଲାପାଳ, ଦେବୋତ୍ତର କମିଶନରଙ୍କ ନିକଟକୁ ଯାଇ ଫେରାଦ ହେବେ। ଏପରିକି ଆବଶ୍ୟକ ପଡିଲେ ରାଧାକୃଷ୍ଣଙ୍କ ଲାଗି ଅଦାଲତର ମଧ୍ୟ ଆଶ୍ରୟ ନେଇ ଯେ କୌଣସି ମତେ ଜମି ଫେରାଇ ଆଣିବା ଲାଗି ପ୍ରସ୍ତୁତ ହୋଇଛନ୍ତି। ଏଥିନେଇ ସବ ରେଜିଷ୍ଟର କାଳିପ୍ରସାଦ ଧଳଙ୍କ ସହ ଯୋଗାଯୋଗ କରାଯିବାରେ କହିଛନ୍ତି ଯେ ସେ ଛୁଟିରେ ଅଛନ୍ତି। ଏଭଳି ଘଟଣା ତାଙ୍କର ଜ୍ଞାତ ସାରରେ ହୋଇନାହିଁ। ଛୁଟିରୁ ଫେରିବା ପରେ ଏହାର ତଦନ୍ତ କରି ସତ୍ୟତା ଥିଲେ ପଦକ୍ଷେପ ନେବେ ବୋଲି କହିଛନ୍ତି।