କେସିଙ୍ଗା,୩୧।୧୦(ଡି.ଏନ.ଏ.): ରାଜ୍ୟର ପ୍ରତ୍ୟେକ ବ୍ଲକରେ ମିଶନ ଶକ୍ତି ଭବନ ନିର୍ମାଣ ପାଇଁ ସରକାର ଲକ୍ଷ ଲକ୍ଷ ଟଙ୍କା ମଞ୍ଜୁର କରୁଛନ୍ତି। ଏହିକ୍ରମରେ କଳାହାଣ୍ଡି ଜିଲା କେସିଙ୍ଗା ବ୍ଲକରେ ୨୦୨୧-୨୨ ଆର୍ଥିକ ବର୍ଷରେ ମିଶନ ଶକ୍ତି ଭବନ ନିର୍ମାଣ ପାଇଁ ଭବାନୀପାଟଣା ପିଡବ୍ଲୁଡ଼ି ବିଭାଗକୁ ରାଜ୍ୟ ସରକାର ଦାୟିତ୍ୱ ଦେଇଛନ୍ତି। ଏହାର ନିର୍ମାଣ ପାଇଁ କେସିଙ୍ଗା ଜିଆର କଷ୍ଟ୍ରକଶନ ଟେଣ୍ଡର ପକାଇଥିଲା। ହେଲେ ନିର୍ମାଣାଧୀନ ମିଶନ ଶକ୍ତି ଭବନରେ ବିନା ସୂଚନ ଫଳକ, ନିମ୍ନମାନ କାର୍ଯ୍ୟ ହେଉଛି ବୋଲି କେସିଙ୍ଗା ବୁଦ୍ଧିଜୀବୀମାନେ ପିଡବ୍ଲୁଡି ବିଭାଗର ଏସି, ଏସଡିଓ, ଜେଇ, ଏବଂ ମିଶନ ଶକ୍ତି ବିଭାଗ ବ୍ଲକ ପ୍ରୋଜେକ୍ଟ କୋର୍ଡିନେଟରଙ୍କ ନିକଟରେ ଅଭିଯୋଗ କରିଛନ୍ତି। ସୂଚନା ଯେ, ଗତ ୨୭।୧୨।୨୦୨୧ରେ ଆରମ୍ଭ ହୋଇ ଗତ ୨୯।୯।୨୦୨୨ରେ ସମ୍ପୂର୍ଣ୍ଣ ହେବା କଥା। ଜମି ଚିହ୍ନଟ ପରେ କେସିଙ୍ଗା ସିଡିପିଓ କାର୍ଯ୍ୟାଳୟ ଚିଠି ନମ୍ବର ୬୯/୧୦।୫।୨୦୨୨ ଅନୁସାରେ ଉକ୍ତ ଠିକାଦାରଙ୍କୁ ଜମି ଚିହ୍ନଟ କାଗଜପତ୍ର ଦେବା ପରେ ନିର୍ମାଣ ପାଇଁ ଆଦେଶ ଦିଆଯାଇଥିଲା। ପିଡବ୍ଲୁଡି ବିଭାଗର ଜେଇଙ୍କ ଉପସ୍ଥିତରେ ସବୁ କାର୍ଯ୍ୟ ହେଉଛି। ମିଶନ ଶକ୍ତି ଫଣ୍ଡରୁ ୩୭ ଲକ୍ଷ ୪୫ ହାଜର ୭୧୮ ଟଙ୍କା ବ୍ୟୟ ଅଟକଳରେ ନିର୍ମାଣ ହେଉଛି। ବର୍ତ୍ତମାନ ଉକ୍ତ ଭବନର ଚତୁ ପାର୍ଶରେ ବାଡ଼ା କାମ ଦ୍ରୁତ ଗତିରେ ଚାଲିଛି। ଏ ନେଇ ମିଶନ ଶକ୍ତି ବିଭାଗ ବ୍ଲକ ପ୍ରୋଜେକ୍ଟ କୋର ସବିତା ସେଠୀଙ୍କୁ ପଚାରିବାରୁ ମିଶନ ଶକ୍ତି ଭବନ ଠିକ ଭାବେ କାମ ନିର୍ମାଣ ହେଉଛି ବୋଲି କହିଥିଲେ। ଏ ସଂକ୍ରାନ୍ତରେ ପିବ୍ଲୁଡି ବିଭାଗ ଏସଡିଓ ଭଗବାନ ସାହୁଙ୍କୁ ପଚାରିବାରୁ ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁସାରେ ଗୋଟିଏ ଡ୍ରଇଂରେ ସାରା ଓଡ଼ିଶାରେ ଏହି ମିଶନ ଶକ୍ତି ଭବନ ଠିକ ଭାବେ ଚାଲିଛି। କେହି ବି ଏହି କାମ ଉପରେ ହାତ ମାରିପାରିବେ ନାହିଁ। ଜିଲାର ପ୍ରତ୍ୟେକ ବ୍ଲକ ଏବଂ କେସିଙ୍ଗାରେ ବହୁତ ଭଲ ଭାବେ କାମ ହେଉଛି ବୋଲି ପ୍ରକାଶ କରିଥିଲେ।