ଅନୁଗୋଳ ଅଫିସ, ୧୪ା୩: ତାଳଚେରସ୍ଥିତ ଏମ୍ସିଏଲ୍ର ହିଙ୍ଗୁଲା କ୍ଷେତ୍ର ଦ୍ୱାରା ଗତ ୨୮ ବର୍ଷ ତଳୁ ଆମ୍ବପାଳ ଗ୍ରାମରେ ଜମି ଅଧିଗ୍ରହଣ କରାଯାଇଛି। ହେଲେ ଗ୍ରାମବାସୀଙ୍କୁ ଅଦ୍ୟାବଧି ସେମାନଙ୍କ ପ୍ରାପ୍ୟ ପ୍ରଦାନ କରାଯାଇ ନାହିଁ। ଏପରି କି କମ୍ପାନୀ କର୍ତ୍ତୃପକ୍ଷ ଧରାଛୁଅଁା ଦେଉ ନ ଥିବା ଗ୍ରାମବାସୀ ସୋମବାର ଜିଲାପାଳଙ୍କ ଜନଶୁଣାଣିରେ ଅଭିଯୋଗ କରିଛନ୍ତି।
ଗ୍ରାମବାସୀ କହିଛନ୍ତି, ଏମ୍ସିଏଲ୍ ହିଙ୍ଗୁଳା କ୍ଷେତ୍ର ପକ୍ଷରୁ ଜମି ଅଧିଗ୍ରହଣ କରାଯିବା ସମୟରେ ବାହାର ଅଞ୍ଚଳର କେତେଜଣ ଲୋକ ଆସି ଘର ନିର୍ମାଣ କରି ରହିଥିଲେ। ସେ ସମୟରେ ବାହାର ଲୋକଙ୍କୁ ଏମ୍ସିଏଲ୍ ଘର ଅଧିଗ୍ରହଣ କରିବା ପ୍ରାପ୍ୟ ଦେଉଥିଲା। କିନ୍ତୁ ମୂଳ ଲୋକଙ୍କୁ ଘର ଅଧିଗ୍ରହଣ ପ୍ରାପ୍ୟ ପ୍ରଦାନ କରି ନ ଥିଲା। ଏ ନେଇ ଆମ୍ବପାଳ କ୍ଷତିଗ୍ରସ୍ତ ପ୍ରଜାସଂଘ ପକ୍ଷରୁ ବାରମ୍ବାର ଜିଲାପାଳଙ୍କ କାର୍ଯ୍ୟାଳୟରେ ଅଭିଯୋଗ କରାଯାଇଥିଲା। ହେଲେ ଏଯାଏ ସୁଫଳ ମିଳିପାରି ନାହିଁ। ତେଣୁ ଗ୍ରାମବାସୀଙ୍କୁ ପ୍ରାପ୍ୟ ପ୍ରଦାନ ସହ ବିଶୁଦ୍ଧ ପାନୀୟ ଜଳ ବ୍ୟବସ୍ଥା କରିବାକୁ ଦାବି କରାଯାଇଛି। ଏଥିସହ ଗ୍ରାମରେ କିଭଳି ଭାବେ ପ୍ରଦୂଷଣ ମୁକ୍ତ ପରିବେଶ ରହିବ ସେନେଇ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦାବି କରାଯାଇଛି। ସପ୍ତାହ ମଧ୍ୟରେ ସମସ୍ୟାର ସମାଧାନ ନ ହେଲେ ଅନ୍ୟପନ୍ଥା ଆପଣାଇବେ ବୋଲି ଆମ୍ବପାଳ କ୍ଷତିଗ୍ରସ୍ତ ପ୍ରଜାସଂଘ ସଭାପତି ଧର୍ମାନନ୍ଦ ମାଝି, ସମ୍ପାଦକ ନାରାୟଣ ବେହେରା, ପ୍ରଦୀପ କୁମାର ସାହୁ, ପ୍ରତାପ ସେଠୀ, ସତ୍ୟବ୍ରତ ନାଏକ ପ୍ରମୁଖ ଦାବି କରିଛନ୍ତି।
