ଭୁବନେଶ୍ୱର,୭।୮(ବ୍ୟୁରୋ): ଢେଙ୍କାନାଳ ଜେଲରେ ଜଣେ ବିଚାରାଧୀନ କଏଦୀଙ୍କୁ ନିର୍ଯାତନା ଦିଆଯାଉଛି। ଜେଲ କର୍ମଚାରୀଙ୍କ ମାଡ଼ରେ ତାଙ୍କ ଆଖି ନଷ୍ଟ ହୋଇଥିବା ନେଇ ଶୁକ୍ରବାର ରାଜ୍ୟ ମାନବାଧିକର କମିଶନ(ଓଏଚ୍ଆରସି)ରେ ଅଭିଯୋଗ ହୋଇଛି। ଏପରିକି ଜେଲ କର୍ତ୍ତୃପକ୍ଷ ସମ୍ପୃକ୍ତ କଏଦୀଙ୍କୁ ଦେଖା କରିବାକୁ ତାଙ୍କ ପରିବାର ଲୋକଙ୍କୁ ଛାଡୁନାହାନ୍ତି। ସେ ଅସୁସ୍ଥ ଥିଲେ ମଧ୍ୟ ଚିକିତ୍ସା ନିମନ୍ତେ ତାଙ୍କୁ ମେଡିକାଲ ନିଆଯାଉନାହିଁ ବୋଲି ଅଭିଯୋଗ ହୋଇଛି। ସମ୍ପୃକ୍ତ କଏଦୀଙ୍କ ସମ୍ପର୍କାୟ ଭାଇ ଓ ମାନବାଧିକର କର୍ମୀ ପ୍ରଦୀପ୍ତ କୁମାର ନାୟକ ଏନେଇ କମିଶନରେ ପିଟିଶନ ଦାଖଲ କରିଛନ୍ତି।
ପିଟିଶନ ଅନୁଯାୟୀ, କଟକ ସଦରର ସଂଗ୍ରାମ ପାତ୍ରଙ୍କୁ କମିଶନରେଟ୍ ପୋଲିସ ଏକ ହତ୍ୟା ମାମଲାରେ ଗିରଫ କରିଥିଲା। ଉକ୍ତ ହତ୍ୟାକାଣ୍ଡରେ ସମ୍ପୃକ୍ତି ନ ଥିଲେ ମଧ୍ୟ ପୋଲିସ ତାଙ୍କୁ ଗିରଫ କରି ଜେଲ ପଠାଇଥିଲା। ୨୦୧୩ ଅଗଷ୍ଟରୁ ୨୦୨୧ମେ ଯାଏ ସଂଗ୍ରାମ ଭୁବନେଶ୍ୱର ଝାରପଡ଼ା ସ୍ବତନ୍ତ୍ର ଜେଲରେ ବିଚାରାଧୀନ କଏଦୀ ଭାବେ ରହିଥିଲେ। ଏହାପରେ ତାଙ୍କୁ ଢେଙ୍କାନାଳ ଜେଲକୁ ସ୍ଥାନାନ୍ତର କରାଯାଇଥିଲା। କୋଭିଡ୍ କଟକଣା ପାଇଁ ସଂଗ୍ରାମଙ୍କ ସହ ତାଙ୍କ ପରିବାର ଲୋକଙ୍କର ଦେଖା ହୋଇ ପାରୁ ନ ଥିଲାବେଳେ ତାଙ୍କୁ ଜେଲରେ ନିର୍ଯାତନା ଦିଆଯାଉଥିବା ନେଇ ଉକ୍ତ ଜେଲରୁ ଫେରିଥିବା ଜଣେ କଏଦୀଙ୍କ ନିକଟରୁ ଖବର ମିଳିଥିଲା। ସଂଗ୍ରାମଙ୍କୁ ରାତି ଅଧରେ ଅନ୍ୟଏକ ଓ୍ବାର୍ଡକୁ ସ୍ଥାନାନ୍ତର ପାଇଁ ଜେଲ କର୍ତ୍ତୃପକ୍ଷ କହିଥିଲେ। ମାତ୍ର ସଂଗ୍ରାମ ସକାଳେ ପରିବର୍ତ୍ତନ କରିବେ ବୋଲି କହିବାରୁ ଜେଲ୍ କର୍ତ୍ତୃପକ୍ଷ ତାଙ୍କୁ ମାଡ଼ ମାରିଥିଲେ। ଏଥିରେ ତାଙ୍କ ବାମ ଆଖି ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ଖବର ପାଇବା ପରେ ପରିବାର ଲୋକେ ଜେଲକୁ ପ୍ରତିଦିନ ଯାଉଥିଲେ ମଧ୍ୟ ଫାଟକରୁ ଫେରାଇ ଦିଆଯାଉଛି। ଏପରିସ୍ଥଳେ ତାଙ୍କର ଚିକିତ୍ସା କରାଯିବା ସହ ପରିବାର ଲୋକଙ୍କୁ ଭେଟିବାକୁ କମିଶନ ନିର୍ଦ୍ଦେଶ ଦିଅନ୍ତୁ। ଏଥିସହିତ ସମ୍ପୃକ୍ତ ଜେଲ କର୍ତ୍ତୃପକ୍ଷଙ୍କ ବିରୋଧରେ ତଦନ୍ତ କରାଯାଇ ଅଭିଯୁକ୍ତଙ୍କୁ ଦଣ୍ଡ ଦିଆଯାଉ ବୋଲି ସଂଗ୍ରାମଙ୍କ ଭାଇ ଓ ପ୍ରଦୀପ୍ତ କମିଶନଙ୍କୁ ନିବେଦନ କରିଛନ୍ତି।
