ତାଳଚେର, ୧୪ା୨ (ନି.ପ୍ର.): ତାଳଚେର-ପାଲଲହଡା ଓ ପରଜଙ୍ଗ ଅଞ୍ଚଳକୁ ନେଇ ତାଳଚେରକୁ ଜିଲା ଘୋଷଣା କରିବା ଦାବିରେ ଉପଜିଲାପାଳଙ୍କ କାର୍ଯ୍ୟାଳୟ ପରିସରରେ ତାଳଚେର କ୍ରିୟାନୁଷ୍ଠାନ କମିଟି ପକ୍ଷରୁ ଚାଲିଥିବା ଶାନ୍ତିପୂର୍ଣ୍ଣ ଗଣଧାରଣା ସୋମବାର ୭୦ ଦିନରେ ପହଞ୍ଚିଛି। କମିଟି ପକ୍ଷରୁ କୁହାଯାଇଛି, ତାଳଚେରରୁ ରାଜ୍ୟ ଓ କେନ୍ଦ୍ର ସରକାର ଅଧିକ ରାଜସ୍ବ ପାଉଥିବାବେଳେ ଏ ଅଞ୍ଚଳର ଉନ୍ନତି ଆଶାନୁରୂପ ହୋଇପାରି ନାହିଁ। ଖଣି ଓ କଳକାରଖାନା ଯୋଗୁ ଏଠାରେ ସବୁବେଳେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଉଛି। ପାଲଲହଡା ଓ ପରଜଙ୍ଗ ଅଞ୍ଚଳରୁ ଜିଲା କାର୍ଯ୍ୟାଳୟ ଅଧିକ ଦୂରତ୍ୱ ହୋଇଥିବାରୁ ଅଞ୍ଚଳବାସୀ ଠିକ୍ ଭାବରେ ପ୍ରଶାସନିକ ସେବା ପାଇପାରୁ ନାହାନ୍ତି। ତାଳଚେରକୁ ଜିଲା କରିବା ପାଇଁ ବିଧାୟକ ଓ ଏମ୍ପି ସରକାରଙ୍କ ଉପରେ ଚାପ ସୃଷ୍ଟି କରନ୍ତୁ ବୋଲି କ୍ରିୟାନୁଷ୍ଠାନ କମିଟି ପକ୍ଷରୁ ଅନୁରୋଧ କରାଯାଇଛି। ତୁରନ୍ତ ତାଳଚେରକୁ ଜିଲା ଘୋଷଣା କରିବା ଦାବିରେ କମିଟି ପକ୍ଷରୁ ଆସନ୍ତା ୨୧ ତାରିଖରେ ବିଧାନସଭା ସମ୍ମୁଖରେ ଗଣଧାରଣା ଦିଆଯିବ ବୋଲି ନିଷ୍ପତ୍ତି ନିଆଯାଇଛି। ଏହି ଗଣଧାରଣାରେ ଚୈତନ୍ୟ ପ୍ରଧାନ, ପଦ୍ମଚରଣ ସାମଲ, ବିଭୂତି ଭୂଷଣ ପଟ୍ଟନାୟକ, ହରିହର ବେହେରା, ସୁବ୍ରତ ଗଡନାୟକ, ଅଭୟ ପାଣି, ବିନୋଦ ଲାଲ, ସଞ୍ଜୀବ ନାଏକ, ଶ୍ରୀକାନ୍ତ ପାଣି, ଦାସରଥି ସାହୁ, ବିରଞ୍ଚି ସାହୁ, ପ୍ରଫୁଲ୍ଲ ନାଏକ, ବାଉରୀବନ୍ଧୁ ବେଜ, ସୁକାନ୍ତ ଦାସ, ବଳରାମ କୁଣ୍ଡ, କେଶବ ଭୂତିଆଙ୍କ ସମେତ ଶତାଧିକ ଅଞ୍ଚଳବାସୀ ଧାରଣାରେ ସାମିଲ ହୋଇଛନ୍ତି।