ଛତ୍ରପୁର,୨୭।୧୨(ଦିଲ୍ଲୀପ ସାମଲ): ଅଦିନିଆ ଲଗାଣ ବର୍ଷା ହେତୁ ଫସଲ କ୍ଷୟକ୍ଷତିର ଭରଣା, ଧାନର ଏଫଏକ୍ୟୁ ମାନ ଉଚ୍ଛେଦ, ଟୋକେନ୍ ଅବଧି ବୃଦ୍ଧି ଏବଂ ଫସଲବୀମା ଅର୍ଥ କୃଷକଙ୍କୁ ପୈଠ କରିବା ବ୍ୟବସ୍ଥା ନିମନ୍ତେ ଶୁକ୍ରବାର ପୋଟ୍ଟଲାମପୁର ପଞ୍ଚାୟତ ବାଣିଲିଙ୍ଗେଶ୍ୱର କୃଷକ ସଂଘ ପକ୍ଷରୁ ଦାବି ହୋଇଛି ।
ସରପଞ୍ଚ ନିରଞ୍ଜନ ପ୍ରଧାନଙ୍କ ନେତୃତ୍ୱରେ ପୂର୍ବତନ ସରପଞ୍ଚ ଭଗବାନ ନାହାକ, ବିଜୟ ପ୍ରଧାନ, ଲଡୁ ପ୍ରଧାନ, ଉପେନ୍ଦ୍ର ପ୍ରଧାନ, ପ୍ରମୋଦ କୁମାର ସାହୁ, ଭାସ୍କର ନାୟକ, ଶତ୍ରୁଘନ ବିଶ୍ୱାଳ ଓ ପାଣିପଂଚାୟତର ସଭାପତି ରାଜେନ୍ଦ୍ର ନାହାକଙ୍କ ସମେତ କୃଷକ ସଂଘର ବହୁ ଚାଷୀ ଉପସ୍ଥିତ ରିହି ଜିଲାପାଳଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲାପାଳ ଡଃ ପ୍ରମୋଦ କୁମାର ପୃଷ୍ଟିଙ୍କୁ ଏକ ଦାବି ପତ୍ର ପ୍ରଦାନ କରିଛନ୍ତି ।
ଏହି ଦାବି ପତ୍ରରେ ପ୍ରଧାନମନ୍ତ୍ରୀ ଫସଲବୀମାରେ ପଞ୍ଜୀକୃତ ଚାଷୀଙ୍କୁ ଯୁଦ୍ଧକାଳୀନ ଭିତିରେ କ୍ଷତିପୂରଣ ଦେବା ନିମନ୍ତେ ବୀମା କମ୍ପାନିକୁ ନିର୍ଦ୍ଦେଶ, ଧାନର ଏଫଏକ୍ୟୁ ମାନ ସଂପୂର୍ଣ୍ଣ ଉଚ୍ଛେଦ, ସରକାରଙ୍କ ପ୍ରଦତ ଟୋକେନ୍ ଅବଧିରେ ପର୍ଯ୍ୟପ୍ତ ସମୟ ନଥିବା ହେତୁ ଲିଖିତ ପ୍ରତ୍ୟାହାର କରି ନୂତନ ଅବଧି ଦିଆଯାଉ, ଲଗାଣ ବର୍ଷାରେ ରବି ଫସଲ ସଂପୂର୍ଣ୍ଣ ନଷ୍ଟ ହେତୁ ପୁନଃ ବିହନ ଯେଗାଣ ନିମନ୍ତେ ବିଭାଗୀୟ ଅଧିକାରୀଙ୍କୁ ଆଦେଶ ଦିଆଯାଉ, ଧାନ କ୍ଷୟ ୟତିର ଆକଳନ କରି ତୁରନ୍ତ ଚାଷୀଙ୍କୁ ସହାୟତା ପ୍ରଦାନ, ଚଳିତ ବର୍ଷ ଧାନ ମଣ୍ଡିର ସୁବ୍ୟବସ୍ଥା ନଥିବା ହେତୁ ପୂର୍ବଭଳି ଧାନକ୍ରୟ କରିବା ପାଇଁ ଉଲ୍ଲେଖ କରାଯାଇଛି । ସରକାର ତଥା ଜିଲ୍ଲା ପ୍ରଶାସନ ଏଦିଗରେ ତୁରନ୍ତ ପଦକ୍ଷେପ ନ ନିଆନ୍ତି ତେବେ ବାଣିଲିଙ୍ଗେଶ୍ୱର କୃଷକ ସଂଘ ପକ୍ଷରୁ ଆନ୍ଦୋଳନ ପନ୍ଥା ଗ୍ରହଣ କରିବା ପାଇଁ ବାଧ୍ୟ ହେବୁ ବୋଲି ଚେତାବନୀ ଦିଆଯାଇଛି ।