ଢେଙ୍କାନାଳ ଅଫିସ, ୧୩।୨:ମିଳିଥିବା ଟୋକନ ଅନୁଯାୟୀ ବିକ୍ରି ସରିଛି ଧାନ। ହେଲେ ଅମଳ ତୁଳନାରେ ଏହା ଯଥେଷ୍ଟ କମ୍। ବଳିଯାଇଥିବା ଧାନ ଅସୁରକ୍ଷିତ ଭାବେ ଖଳାରେ ଏବଂ ଘର ବାରଣ୍ଡାରେ ପଡ଼ିଥିବାବେଳେ ହାତୀ, ବାର୍ହା ମୁହଁରେ ଯାଉଛି। ଏଭଳି ସ୍ଥିତିରେ ଝାଳବୁହା ପରିଶ୍ରମ କରି ଉତ୍ପାଦନ କରିଥିବା ଧାନ କୁଆଡ଼େ ନେବେ, କାହାକୁ ଏବଂ କେମିତି ବିକ୍ରି କରିବେ ତାହାକୁ ନେଇ ଚିନ୍ତାରେ ପଡ଼ିଛନ୍ତି ଢେଙ୍କାନାଳ ଜିଲାର ଚାଷୀ। ଅନ୍ୟପଟେ ଦ୍ୱିତୀୟ ପର୍ଯ୍ୟାୟ ଧାନ ସଂଗ୍ରହ କେବେ ଆରମ୍ଭ ହେବ ତାହା ସ୍ପଷ୍ଟ ହୋଇପାରୁ ନ ଥିବାରୁ ଏହାର ସୁଯୋଗରେ ଦଲାଲ ସକ୍ରିୟ ହୋଇଉଠିଛନ୍ତି।
ଢେଙ୍କାନାଳ ଜିଲାରେ ପ୍ରଥମ ପର୍ଯ୍ୟାୟରେ ୧୨ଲକ୍ଷ ୯୬ ହଜାର ୨୫୦ କୁଇଣ୍ଟାଲ ଧାନ ସଂଗ୍ରହ କରାଯିବାକୁ ଲକ୍ଷ୍ୟ ଧାର୍ଯ୍ୟ ହୋଇଥିଲା। ଏଥିଲାଗି ୧୩୬ ମଣ୍ଡି କରାଯାଇଥିଲା। ସେଥିରୁ ୮୦ଟି ପାକ୍ସ ଏବଂ ଅବଶିଷ୍ଟ ୫୬ଟି ଏସ୍ଏଚ୍ଜି ପରିଚାଳନା କରୁଛି। ୨୦୨୨ ଡିସେମ୍ବର ୨୮ରୁ ୨୦୨୩ ମାର୍ଚ୍ଚ ୩୧ ଯାଏ ଧାନକିଣା ଲାଗି ସମୟସୀମା ଧାର୍ଯ୍ୟ କରାଯାଇଥିବାବେଳେ ପଞ୍ଜୀକୃତ ୫୮ ହଜାର ୧୮୮ ଚାଷୀ ଟୋକନ ପାଇଥିଲେ। ଫେବୃୟାରୀ ପ୍ରଥମ ଦ୍ୱିତୀୟ ସପ୍ତାହ ସୁଦ୍ଧା ୧୦ ଲକ୍ଷରୁ ଊର୍ଦ୍ଧ୍ୱ କୁଇଣ୍ଟାଲ ଧାନ କିଣା ସରିଲାଣି। ବୃହତ୍ ଚାଷୀମାନେ ନିର୍ଦ୍ଧାରିତ ପରିମାଣର ଧାନ ବିକ୍ରି କରିସାରିଥିବାବେଳ ଏବେ ସେମାନଙ୍କୁ ଘାରିଛି ବଳକା ଧାନ ବିକ୍ରି ଚିନ୍ତା। ଧାନ ଅମଳ ସମୟରେ କୃଷି ବିଭାଗ ପକ୍ଷରୁ ଠିକ୍ ଭାବେ ସର୍ଭେ କରାଯାଉ ନ ଥିବାରୁ କମ୍ ଟାର୍ଗେଟ୍ ମିଳୁଛି। ତେଣୁ ଏଭଳି ସମସ୍ୟା ସୃଷ୍ଟି ହୋଇଥିବା ଚାଷୀମାନେ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ଚଳିତବର୍ଷ ଜିଲାରେ ମୋଟ ୧୬ ଲକ୍ଷ ୪୧ହଜାର ୧୨୬ କୁଇଣ୍ଟାଲ ଧାନ ଉତ୍ପାଦନ ହୋଇଥିବା କୃଷି ବିଭାଗ ପକ୍ଷରୁ ଆକଳନ କରାଯାଇଛି। ଦ୍ୱିତୀୟ ପର୍ଯ୍ୟାୟରେ ଆଉ ୩ ଲକ୍ଷ ୪୪ହଜାର ୮୭୬ କୁଇଣ୍ଟାଲ ଧାନ କିଣିବା ଲାଗି ଯୋଗାଣ ବିଭାଗ ପକ୍ଷରୁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଛି। ଏହାସତ୍ତ୍ୱେ ସମସ୍ତଙ୍କଠାରୁ ଧାନ କିଣାଯାଇପାରିବ ନାହିଁ ବୋଲି ବହୁ ଚାଷୀ ଅଭିଯୋଗ କରିଛନ୍ତି। ସଦର ବ୍ଲକ ଗୋବିନ୍ଦପୁର ଗ୍ରାମର ଚାଷୀ ସନ୍ତୋଷ ସ୍ବାଇଁ କୁହନ୍ତି, ଚଳିତ ବର୍ଷ ୨୩୦ କୁଇଣ୍ଟାଲ ଧାନ ଉତ୍ପାଦନ ହୋଇଛି। ପ୍ରାୟ ୩୦ କୁଇଣ୍ଟାଲ ଧାନ ହାତୀ ଓ ବାର୍ହା ନଷ୍ଟ କରିଦେଲେ। ୫୪ କୁଇଣ୍ଟାଲ ଧାନ ରାଜ୍ୟ ବିହନ ବିକ୍ରି ସଂସ୍ଥାକୁ ଦେଲୁ। ବାକି ୧୧୬ କୁଇଣ୍ଟାଲ ମଣ୍ଡିରେ ବିକ୍ରି କରାଯାଇଛି। ତଥାପି ପ୍ରାୟ ୩୦ କୁଇଣ୍ଟାଲ ଧାନ ଘରେ ପଡ଼ିଛି। ସରକାର ଧାନ ନ କିଣିଲେ ବ୍ୟବସାୟୀଙ୍କୁ କମ୍ ଦରରେ ବିକ୍ରି କରିବାକୁ ବାଧ୍ୟ ହେବୁ ବୋଲି ସେ କହିଛନ୍ତି।
ଏ ସଂକ୍ରାନ୍ତରେ ଜିଲା ଯୋଗାଣ ଅଧିକାରୀ ନିରଦ ରଞ୍ଜନ ଦାସ କୁହନ୍ତି, କୃଷି ବିଭାଗର ସର୍ଭେ ଅନୁଯାୟୀ ମଣ୍ଡିରେ ଧାନ ବିକ୍ରି ଟାର୍ଗେଟ୍ ଧାର୍ଯ୍ୟ ହେଉଛି। ଆବଶ୍ୟକତାକୁ ନଜରରେ ରଖି ପୁନର୍ବାର ମଣ୍ଡି ମାଧ୍ୟମରେ ୩ ଲକ୍ଷ ୪୪ ହଜାର ୮୭୬ କୁଇଣ୍ଟାଲ ଧାନ କିଣିବା ଲାଗି ପ୍ରସ୍ତାବ ଦିଆଯାଇଛି। ଜିଲା ମୁଖ୍ୟ କୃଷି ଅଧିକାରୀ ଶରତ କୁମାର ତୋଷ କୁହନ୍ତି, ରାଜସ୍ବ, କୃଷି ଓ ପରିସଂଖ୍ୟାନ ବିଭାଗର ପଦସ୍ଥ ଅଧିକାରୀଙ୍କ ଉପସ୍ଥିତିରେ ଧାନ ଅମଳ ସମ୍ପର୍କିତ ସର୍ଭେ କରାଯାଇଥାଏ। ଚାଷୀମାନେ ଏହାକୁ ଭଲଭାବେ ଜାଣିପାରନ୍ତି ନାହିଁ। ଏବେ ସବୁ ରିପୋର୍ଟ ଅନ୍ଲାଇନ୍ ମାଧ୍ୟମରେ ପଠାଯାଉଛି। ତେଣୁ ମନଇଚ୍ଛା ସର୍ଭେ କରିବା ସମ୍ଭବ ନୁହେଁ ା ଅନଲାଇନ ପୂର୍ବରୁ କେଉଁଠି କ’ଣ ହେଉଥିଲା ତାହା କହିପାରିବୁନାହିଁ। କିନ୍ତୁ ୨୦୧୯ ପରେ ସବୁକିଛି ଅନ୍ଲାଇନ ମାଧ୍ୟମରେ ଫଟୋ ସହ କରାଯାଉଛି।