ହାଟଡିହୀ,୨୮l୧୧(ଡି.ଏନ.ଏ.): ଭାରି କଷ୍ଟ ହେଉଛି। ସିଧା ହୋଇ ଠିଆ ହୋଇ ପାରୁନି କି ପେଟେଇ ଏବଂ କଡ଼ ଲେଉଟେଇ ଶୋଇ ପାରୁନି। ସବୁବେଳେ ଯନ୍ତ୍ରଣା ହେଉଛି l ତଳି ପେଟରେ ଥିବା ମାଂସ ପିଣ୍ଡୁଳାରୁ ଆପେ ଆପେ ପରିଶ୍ରା ବୋହୁଛି। ଦୀର୍ଘ ୨୦ ବର୍ଷ ହେବ ଏମିତି ଯନ୍ତ୍ରଣା ସହୁଛି। ମୋ ଦେହ ଆଉ ଭଲ ହେବନି କି ଆଉ ଏ ଛଟପଟ ଯନ୍ତ୍ରଣା ସହି ପାରିବିନି। ଏପରି କଥା କହିଛନ୍ତି କେନ୍ଦୁଝର ଜିଲା ହାଟଡିହୀ ବ୍ଲକ ଢେଙ୍କା ପଞ୍ଚାୟତ ମୋଟରାଗଡିଆ ଗ୍ରାମର ନାରାୟଣ ସେଠୀଙ୍କ ପୁଅ ଚିନ୍ତାମଣି (୨୫)। ପିଲାଟି ବେଳୁ ଚିନ୍ତାମଣିଙ୍କ ତଳି ପେଟରେ ଏକ ମାଂସ ପେଣ୍ଡୁଳା ବାହାରିଥିଲା। ସେହି ମାଂସ ପିଣ୍ଡୁଳା ଦେଇ ଆପେ ଆପେ ପରିଶ୍ରା ବାହାରେ। ବୟସ ବଢିବା ଅନୁସାରେ ମାଂସ ପେଣ୍ଡୁଳା ବି ବଢିଲା। ସେହି ମାଂସ ପେଣ୍ଡୁଳା ଦେଇ କେତେବେଳେ ପରିଶ୍ରା ତ ଆଉ କେତେବେଳେ ରକ୍ତ ବୋହିଲା। ଯନ୍ତ୍ରଣା ଅସହ୍ୟ ହେଲା। ଦୁଇ ବର୍ଷ ପୂର୍ବେ ବାପା ନାରାୟଣ ଧାର କରଜ କରିବା ସହ ନିଜର ଥିବା ସବୁ ଚାଷ ଜମିକୁ ବିକି ପୁଅକୁ ଚିକିତ୍ସା କରିବାକୁ ନେଲେ। ଅପରେସନ ହେଲା। କିନ୍ତୁ ୭ ଦିନ ଯାଇନି। ଚିନ୍ତାମଣି ପୂର୍ବ ପରି ଯନ୍ତ୍ରଣା ଭୋଗିଲେ। ଚଳିତ ବର୍ଷ ଗତ ସେପ୍ଟମ୍ବର ମାସ କଟକ ମେଡିକାଲ ଯାଇଥିଲେ। ବିଭିନ୍ନ ପରୀକ୍ଷା ନିରୀକ୍ଷା ବି ହେଲା। କିନ୍ତୁ ଏ ରୋଗର ଚିକତ୍ସା ଏଠି ହୋଇ ପାରିବନି କହି ଡାକ୍ତର ସେମାନଙ୍କୁ ଫେରାଇ ଦେଇଥିବା ଚିନ୍ତାମଣି କହିଛନ୍ତି। ଫଳରେ ଆଉ ସମ୍ବଳ ନ ଥିବାରୁ ଚିକିତ୍ସା ହୋଇ ପାରୁନି। ଘରେ ପଡି ରହି ଦିନ ରାତି ଯନ୍ତ୍ରଣା ଭୋଗୁଛନ୍ତି ଚିନ୍ତାମଣି। ବୁଢା ବାପାଙ୍କ ପାଇଁ ପୁଅ ଏବେ ବୋଝ ପାଲଟି ଯାଇଛନ୍ତି। ସୂଚନା ଯୋଗ୍ୟ ବାପା ନାରାୟଣ ବୃଦ୍ଧ ବୟସର ହୋଇଥିବା ବେଳେ ସେ ମଧ୍ୟ ରୋଗାକ୍ରାନ୍ତ ଅଟନ୍ତି। ମାଟି ଝୁମ୍ପୁଡ଼ି ଦୁଇ ବଖରା ଘରେ ପାଞ୍ଚ କୁଟୁମ୍ବ ଦୟନୀୟ ଜୀବନ ଯାପନ କରୁଛନ୍ତି। ଏମାନଙ୍କୁ ସରକାରୀ ଯୋଜନାରେ ଆବାସ ଗୃହ କିମ୍ବା ଭତ୍ତା ଖଣ୍ଡିଏ ମିଳି ପାରିନି। କେବଳ ରାଶନ କାର୍ଡରେ ଯାହା ମିଳୁଛି ଏବଂ ଅନ୍ୟ ଉପରେ ନିର୍ଭର କରି ମାଗଣ କରି ଏମାନେ ଜୀବନ ବିତାଉଛନ୍ତି। ପୁଅ ଚିନ୍ତାରେ ମା’ ଓ ବାପା ଭାଙ୍ଗି ପଡିଛନ୍ତି। ସରକାର ଏବଂ ପ୍ରଶାସନ ତୁରନ୍ତ ସାହାଯ୍ୟ କରିବାକୁ ତାଙ୍କ ବାପା ନାରାୟଣ ନିବେଦନ କରିଛନ୍ତି।