ଢେଙ୍କାନାଳ ଅଫିସ, ୪।୨-ସରିନି ଶୀତ କି ଆରମ୍ଭ ହୋଇନି ଖରା। ହେଲେ ଏବେଠାରୁ ଢେଙ୍କାନାଳ ଜିଲାର ଶିଳ୍ପସମୃଦ୍ଧ ଓଡ଼ାପଡ଼ା ବ୍ଲକ କୁସୁପଙ୍ଗା ଗ୍ରାମ ୪ନଂ. ୱାର୍ଡ ଭଞ୍ଜସାହି ଓ ମହାରଥୀ ସାହିରେ ଜଳକଷ୍ଟ ଉତ୍କଟ ରୂପ ଧାରଣ କଲାଣି। ଆଗକୁ ଗ୍ରୀଷ୍ମ ଆସୁଥିବାବେଳେ ସମସ୍ୟା ଆହୁରି ବଢ଼ିବ ବୋଲି ଏବେଠାରୁ ଜଳଜଳ ହୋଇ ଦିଶିଲାଣି। ଅନ୍ୟପଟେ ବାରମ୍ବାର ଦାବିସତ୍ତ୍ୱେ ବ୍ଲକ କର୍ତ୍ତୃପକ୍ଷ ଏବଂ ଗ୍ରାମ୍ୟ ଜଳଯୋଗାଣ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏହାର ତୁରନ୍ତ ପ୍ରତିକାର ଦାବିରେ ଗୁରୁବାର ଅଞ୍ଚଳବାସୀ ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି।
ଅଭିଯୋଗରୁ ଜଣାପଡ଼ିଛି, ଗ୍ରାମ ନିକଟରେ ବ୍ରାହ୍ମଣୀ ନଦୀରେ ଗୋଟିଏ ଇନଟେକ୍ ୱେଲ୍ ତିଆରି କରାଯାଇ ଗ୍ରାମକୁ ପାନିୟଜଳ ଯୋଗାଣର ସୁବିଧା କରାଯାଇଛି। ହେଲେ ଭଞ୍ଜସାହି ଓ ମହାରଥୀ ସାହିକୁ ପାଣି ପହଞ୍ଚତ୍ପାରୁନାହିଁ। ଗ୍ରାମର ଉପର ମୁଣ୍ଡରେ ଗୋଟିଏ ଓଭରହେଡ୍ ପାଣି ଟାଙ୍କି ରହିଥିଲେ ମଧ୍ୟ ଏଥିରୁ ସାହିକୁ ଜଳଯୋଗାଣ ପାଇଁ ବ୍ୟବସ୍ଥା କରାଯାଇନାହିଁ। ଏ ସଂକ୍ରାନ୍ତରେ ଗ୍ରାମବାସୀ ଗତମାସ ୪ ତାରିଖର ଓଡ଼ାପଡ଼ା ବିଡିଓଙ୍କୁ ଲିଖିତ ଭାବେ ଜଣାଇଥିଲା। ସମସ୍ୟା ସମ୍ପର୍କରେ ଗ୍ରାମ୍ୟ ଜଳଯୋଗାଣ ବିଭାଗ ସହକାରୀ ଯନ୍ତ୍ରୀଙ୍କୁ ମଧ୍ୟ ଅବଗତ କରାଯାଇଥିଲା। ଏହାସତ୍ତ୍ୱେ କୌଣସି ପଦକ୍ଷେପ ନିଆଗଲାନାହିଁ। ଫଳରେ ସମ୍ପୃକ୍ତ ଦୁଇସାହିର ଶତାଧିକ ବାସିନ୍ଦା ପାଣି ପାଇଁ ଡହଳବିକଳ ହେଉଛନ୍ତି। ଏହାର ତୁରନ୍ତ ସମାଧାନ ନ ହେଲେ ପ୍ରଶାସନକୁ ଅଚଳ କରି ଦିଆଯିବ ବୋଲି ଅସନ୍ତୁଷ୍ଟ ଗ୍ରାମବାସୀ ଚେତାବନୀ ଦେଇଛନ୍ତି।
ଏ ସଂକ୍ରାନ୍ତରେ ଗ୍ରାମ୍ୟ ଜଳଯୋଗାଣ ବିଭାଗ ନିର୍ବାହୀ ଯନ୍ତ୍ରୀ ସୁରେନ୍ଦ୍ର ବେହେରା କୁହନ୍ତି, ଅଭିଯୋଗ ପାଇଛୁ। କାମ ନେଇଥିବା ଠିକାଦାରଙ୍କ ସହିତ ଆଲୋଚନା କରାଯାଇଛି। ଶୁକ୍ରବାର ଗ୍ରାମକୁ ପାଣି ଯୋଗାଣର ବ୍ୟବସ୍ଥା କରାଯିବ।