ସାକ୍ଷୀଗୋପାଳ, ୧୭।୯(ସ୍ବ.ପ୍ର./ଡି.ଏନ୍.ଏ.): ସତ୍ୟବାଦୀ ବ୍ଲକରେ ଥିବା ସାକ୍ଷୀଗୋପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ସ୍ଥାନୀୟ ଅଞ୍ଚଳର ପ୍ରାୟ ଦେଢ଼ଲକ୍ଷ ଲୋକ ନିର୍ଭର କରିଥାନ୍ତି। ଜାତୀୟ ରାଜପଥ ପାର୍ଶ୍ୱରେ ସ୍ବାସ୍ଥ୍ୟକେନ୍ଦ୍ରଟି ରହିଥିବାରୁ ଏଠାକୁ ରାସ୍ତା ଦୁର୍ଘଟଣାରେ ଶିକାର ଅନେକ ଗୁରୁତର ରୋଗୀ ଚିକିତ୍ସା ପାଇଁ ଆସିଥାନ୍ତି। ସ୍ବାସ୍ଥ୍ୟ ସେବା ପରିମଳ ପାଇଁ ଏହି ସ୍ବାସ୍ଥ୍ୟକେନ୍ଦ୍ର ଆଇଏସ୍ଓ ମାନ୍ୟତା ସହ କାୟାକଳ୍ପ ପୁରସ୍କାର ପାଇଛି। ହେଲେ ଏହି ସ୍ବାସ୍ଥ୍ୟକେନ୍ଦ୍ର ଅବସ୍ଥା ଏବେ ଶୋଚନୀୟ ହୋଇପଡ଼ିଛି।
ବହୁ ପୁରାତନ ଏହି ସ୍ବାସ୍ଥ୍ୟକେନ୍ଦ୍ରକୁ ୨୪ା୬ା ୨୦୦୬ରେ ସରକାରଙ୍କ ପକ୍ଷରୁ ବିପୁଳ ଅର୍ଥ ଅନୁଦାନରେ ନବୀକରଣ କରାଯାଇଥିଲା। ଏବେ କିନ୍ତୁ ଏହି ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ତଥା ପ୍ରଥମ ବିଲ୍ଡିଂର ଅନେକ ସ୍ଥାନରେ କଂକ୍ରିଟ ଖସିବା ସହ ବ୍ୟବହୃତ ହୋଇଥିବା ଲୁହାରଡ଼ରେ କଳଙ୍କି ଲାଗି ବାହାରକୁ ବିପଦପୂର୍ଣ୍ଣ ଅବସ୍ଥାରେ ରହିଛି। ଏହି କଂକ୍ରିଟ ଦୀର୍ଘଦିନ ତଳୁ ଖଣ୍ଡ ଖଣ୍ଡ ହୋଇ ଖସୁଥିଲେ ମଧ୍ୟ ସ୍ବାସ୍ଥ୍ୟକେନ୍ଦ୍ର କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଉ ନାହାନ୍ତି କି ମରାମତି ମଧ୍ୟ କରୁ ନ ଥିବା ଅଭିଯୋଗ ହୋଇଛି। ଫଳରେ ଶଯ୍ୟାରେ ଥିବା ରୋଗୀମାନେ ଭୟଭୀତ ଅବସ୍ଥାରେ ରହି ଚିକିତ୍ସିତ ହେଉଛନ୍ତି। ପ୍ରାୟତଃ ପ୍ରସୂତି ଓ ମହିଳା କକ୍ଷ ଓ ପୁରୁଷ କକ୍ଷରୁ ଅଧିକ କଂକ୍ରିଟ ଖସୁଥିବା ରୋଗୀ ଓ ରୋଗୀଙ୍କ ସମ୍ପର୍କୀୟମାନେ କହିଛନ୍ତି। ତେବେ ଏଯାବତ କୌଣସି ରୋଗୀଙ୍କ ଉପରେ ଏହି କଂକ୍ରିଟ ପଡ଼ି ନ ଥିବାବେଳେ ଏଭଳି ବିପଦକୁ ଏଡ଼ାଇ ଦିଆଯାଇପାରିବ ନାହିଁ। ଏ ନେଇ ଚିକିତ୍ସା ହେଉଥିବା ରୋଗୀଙ୍କ ସମ୍ପର୍କୀୟ ପୂର୍ଣ୍ଣଚନ୍ଦ୍ର ପ୍ରଧାନ କୁହନ୍ତି, ଆମେ ଚିକିତ୍ସା ପାଇଁ ରୋଗୀଙ୍କୁ ହସ୍ପିଟାଲକୁ ଆଣିଛୁ କିନ୍ତୁ ଚିକିତ୍ସା ହେଉଥିବା ସମୟରେ କେତେବେଳେ ଛାତରୁ କଂକ୍ରିଟି ଖସିବ ଭୟ ଲାଗୁଛି । ସେହିଭଳି ଅନ୍ୟ ଏକ ରୋଗୀଙ୍କ ସମ୍ପର୍କୀୟ ଝୁନୁ ନାୟକ କୁହନ୍ତି, ଆମେ ସନ୍ତାନ ପ୍ରସବ ପାଇଁ ବୋହୂକୁ ନେଇ ଆସିଛୁ କିନ୍ତୁ ଏ କକ୍ଷରେ ସବୁ ଫ୍ୟାନ ବୁଲୁ ନ ଥିବାବେଳେ ବିପଦପୂର୍ଣ୍ଣ ଅବସ୍ଥାରେ ରହିଛି। ଲାଗିଥିବା ଏସି ଠିକ୍ ଭାବେ ଚାଲୁନାହିଁ ଓ ଛାତରୁ କଂକ୍ରିଟ ଖସୁଛି, ତେଣୁ ରହିବା ପାଇଁ ଭୟ ଲାଗୁଛି। ଏ ନେଇ ସ୍ବାସ୍ଥ୍ୟକେନ୍ଦ୍ରର ଚିକିତ୍ସା ଅଧିକାରୀ ବିଶ୍ୱଜିତ ମିଶ୍ରଙ୍କୁ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ମଧ୍ୟ ସମ୍ଭବ ହୋଇପାରି ନ ଥିଲା।