ବଲାଙ୍ଗୀର, ୧୫।୧୨: (ସୁନିଲ ମହାନ୍ତି) ବଲାଙ୍ଗୀର ସହର ଉପକଣ୍ଠ ପଥରଚେପା ଠାରେ ଶନିବାର ରାତିରେ ଦୁଇ ପରିବାର ମଧ୍ୟରେ ସଂଘର୍ଷ ରୁ ୪ ଜଣ ଗୁରୁତର ହୋଇଛନ୍ତି । ଏହି ସଂଘର୍ଷରେ ଏକ ଘର ଜଳି ଯାଇଛି । ସମସ୍ତ ଗୁରୁତରଙ୍କୁ ଭୀମଭୋଇ ମେଡିକାଲ କଲେଜ ହସ୍ପିଟାଲକୁ ନିଆଯାଇଛି। ଗୁରୁତରଙ୍କ ମଧ୍ୟରେ ଅତି ଗୁରୁତର ଜଣକୁ ଡାକ୍ତର ତୁରନ୍ତ ବୁର୍ଲା ଭିମସାର ହସ୍ପିଟାଲ ସ୍ଥାନାନ୍ତର କରିବାକୁ ପରାମର୍ଶ ଦେଇଛନ୍ତି ।
ମିଳିଥିବା ସୂଚନା ମୁତାବକ ଶନିବାର ସାରେ କୌଣସି ଏକ କଥାକୁ କେନ୍ଦ୍ରକରି ପଥରଚେପାର ଜଗଦଲା ଓ ମିର୍ଦ୍ଧା ପରିବାର ମଧ୍ୟରେ ଗଣ୍ଡଗୋଳ ଘଟିଥିଲା । ଏଥିରେ ଅଜିତ ମିର୍ଦ୍ଧା (୧୯), ରମାକାନ୍ତ ମିର୍ଦ୍ଧା (୨୦), ହୀରାଲାଲ ଜଗଦଲା (୪୨), ମମତା ଜଗଦଲା (୪୦) ଗୁରୁତର ଆହତ ହୋଇଥିଲେ । ଏହି ଗଣ୍ଡଗୋଳରେ ସୁନୀଲ ଜଗଦଲା (୧୨) ମଧ୍ୟ ଆହତ ହୋଇଛନ୍ତି । ଜଳିଯାଇଥିବା ଘରଟି ହୀରାଲାଲ ଜଗଦଲାଙ୍କ ବୋଲି ଜଣାପଡିଛି। ଖବର ପାଇ ଅଗ୍ନିଶମ ବିଭାଗ କର୍ମଚାରୀ ସେଠାରେ ପହଞ୍ଚି ନିଆଁ ଆୟତ୍ତ କରିଥିଲେ । ଉକ୍ତ ଘରେ କିଏ ନିଆଁ ଲଗାଇଲା ଏବଂ କେଉଁ ନିର୍ଦ୍ଦିଷ୍ଟ କାରଣରୁ ଉଭୟ ପରିବାର ମଧ୍ୟରେ ଗଣ୍ଡଗୋଳ ଘଟିଲା ତାହା ଜଣାପଡିନାହିଁ । ବଲାଙ୍ଗୀର ସଦର ଥାନା ପୋଲିସ ଘଟଣାର ତଦନ୍ତ ଆରମ୍ଭ କରୁଛି ।