ଭଣ୍ଡାରିପୋଖରୀ,୧୪।୧୧(ସ୍ବ.ପ୍ର.)-ଭଦ୍ରକ ଜିଲା ଭଣ୍ଡାରିପୋଖରୀ ଥାନା ଅଧୀନ ରାଜେନ୍ଦ୍ରପୁର ପଞ୍ଚାୟତ କୋଟସିରା ଗ୍ରାମରେ ସୋମବାର ଜାଗାବାଡ଼ିକୁ କେନ୍ଦ୍ରକରି ଦୁଇ ପରିବାର ମଧ୍ୟରେ ଗଣ୍ଡଗୋଳ ଘଟିଛି। ଏଥିରେ ଉଭୟ ପକ୍ଷରୁ ୩ ଜଣ ଆହତ ହୋଇଛନ୍ତି।
ଗ୍ରାମର ହରିନାରାୟଣ ନାୟକ ଥାନାରେ ଅଭିଯୋଗ କରିଛନ୍ତି ଯେ, ତାଙ୍କ ପୈତୃକ ଜାଗାରେ ସେ ଘର ନିର୍ମାଣ କରୁଥିଲେ। ଏହି ସମୟରେ ଅପରପକ୍ଷର ୧୫/୨୦ଜଣ ଲୋକ ସଂଘବଦ୍ଧ ହୋଇ ତାଙ୍କୁ ଓ ତାଙ୍କ ସ୍ତ୍ରୀ ମମତା ନାୟକଙ୍କୁ ଆକ୍ରମଣ କରିଥିଲେ। ଏଥିରେ ମମତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି। ଅପରପକ୍ଷ ସୁପ୍ରଭା ନାୟକଙ୍କ ଅଭିଯୋଗ ଅନୁଯାୟୀ, ବିବାଦୀୟ ସ୍ଥାନରେ ଘର ନିର୍ମାଣ ହେଉଥିବାରୁ ସେ ବିରୋଧ କରିଥିଲେ। ଅପରପକ୍ଷ ତାଙ୍କୁ ଓ ତାଙ୍କ ପରିବାର ଲୋକଙ୍କୁ ଆକ୍ରମଣ କରିଛନ୍ତି। ଉଭୟ ପକ୍ଷର ଅଭିଯୋଗ ଆଧାରରେ ପୋଲିସ ଦୁଇଟି ମାମଲା (ନଂ.୩୮୯/୨୨ ଓ ୩୯୦/୨୨) ରୁଜୁ କରି ଘଟଣାର ତଦନ୍ତ ଚଳାଇଛି।