ଟିଟିଲାଗଡ଼, ୨୫।୧୦(ଡି.ଏନ.ଏ.): ମମିତା ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଟିଟିଲାଗଡ ପୋଲିସ ବାରାକରୁ ଗତ ୧୭ ତାରିଖ ରାତିରେ ଫେରାର ହେବା ଦିନଠାରୁ ଭିନ୍ନ ଆଲୋଚନା ଜୋର ଧରିଛି। ଏଥର ଆଲୋଚନା ଗୋବିନ୍ଦଙ୍କ କରୋନା ଟେଷ୍ଟକୁ ନେଇ। ୧୭ତାରିଖ ରାତିରେ ବାରାକରୁ ଗୋବିନ୍ଦ ଫେରାର ହୋଇଥିବା ବେଳେ ଟିଟିଲାଗଡ ଡାକ୍ତରଖାନା ରିପୋର୍ଟରେ ୧୮ ତାରିଖ ତାଙ୍କର କରୋନା ପରୀକ୍ଷଣ କରାଯାଇଥିବା ଦର୍ଶାଯାଇଥିବାକୁ ନେଇ କେତେକ ବୈଦ୍ୟୁତିକ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ହେଲେ ଡାକ୍ତରଖାନା କର୍ତ୍ତୃପକ୍ଷ କହିଛନ୍ତି ଯେ, ୧୭ ତାରିଖ ଅପରାହ୍ନ ୩.୨୫ରେ ଗୋବିନ୍ଦଙ୍କ କରୋନା ପରୀକ୍ଷା କରାଯାଇଛି। ତାଙ୍କର ପଞ୍ଜିକରଣ ସଂଖ୍ୟା ୬୩୭୫୮ ଏବଂ କ୍ରମିକ ସଂଖ୍ୟା ୧୯୬ ବୋଲି ଉପଖଣ୍ଡ ସ୍ବାସ୍ଥ୍ୟ ଅଧିକାରୀ ଡା. ପ୍ରଦୀପ ନାୟକ ସ୍ପଷ୍ଟ କରିଛନ୍ତି। ପ୍ରତ୍ୟେକ ଦିନ ଜିଲାପାଳ ତଥା ଜିଲା ସ୍ବାସ୍ଥ୍ୟ ଅଧିକାରୀଙ୍କ ପାଖକୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ସଂକ୍ରମିତଙ୍କ ସଂଖ୍ୟା ତଥା ପରୀକ୍ଷା ସଂଖ୍ୟାର ରିପୋର୍ଟ ଯାଇଥାଏ। ଦିନ ୧୨ଟା ପରେ ଯାହା ରିପୋର୍ଟ ଆସେ ତା ପରଦିନକୁ ହିସାବ ଯାଏ। ଏହାକୁ ନେଇ କୌଣସି ସନ୍ଦେହ ନାହିଁ ବୋଲି ଡା. ନାୟକ କହିଛନ୍ତି।