ନୂଆଦିଳ୍ଲୀ,୧୧।୧୨: ଦିଲ୍ଲୀ ନିର୍ବାଚନରେ ମିଳିତ ମେଣ୍ଟ ପାଇଁ କଂଗ୍ରେସ ଏବଂ ଆମ ଆଦମୀ ପାର୍ଟି (ଏଏପି) ମଧ୍ୟରେ ହୋଇଥିବା ଚୁକ୍ତି ଶେଷ ପର୍ଯ୍ୟାୟରେ ଅଛି। ସୂଚନାନୁସାରେ, କଂଗ୍ରେସକୁ ୧୫ଟି ଆସନ ଏବଂ ଅନ୍ୟ ଇଣ୍ଡିଆ ଆଲାଇନ୍ସ ପାର୍ଟିକୁ ୧-୨ ଟି ସିଟ ଦିଆଯାଇପାରେ। ଏହା ବ୍ୟତୀତ ଆମ ଆଦମୀ ପାର୍ଟି ଅନ୍ୟ ଆସନରେ ନିର୍ବାଚନ ଲଢିବେ।
ସୂଚନାନୁସାରେ, ମଙ୍ଗଳବାର ସନ୍ଧ୍ୟାରେ ଏନଏସି ନେତା ଶରଦ ପାୱାରଙ୍କ ବାସଭବନରେ ଏଏପି ମୁଖ୍ୟ ଅରବିନ୍ଦ କେଜ୍ରିୱାଲ ଏବଂ ବରିଷ୍ଠ କଂଗ୍ରେସ ନେତାଙ୍କ ମଧ୍ୟରେ ସାକ୍ଷାତ ହୋଇଥିଲା। ରାହୁଲ ଗାନ୍ଧୀଙ୍କ କାର୍ଯ୍ୟକ୍ରମ ବାତିଲ ହେବା ପରେ ଦିଲ୍ଲୀରେ ଏଏପି- କଂଗ୍ରେସ ମିଳିତ ମେଣ୍ଟର ଆଲୋଚନା ସାମ୍ନାକୁ ଆସିଛି।
ବର୍ତ୍ତମାନ ସୁଦ୍ଧା ଉଭୟ ଦଳ ବିଧାନସଭା ନିର୍ବାଚନରେ ମିଳିତ ମେଣ୍ଟର ଆଲୋଚନାକୁ ସର୍ବସାଧାରଣରେ ପ୍ରତ୍ୟାଖ୍ୟାନ କରିଛନ୍ତି। କେବଳ ୭୦ଟି ଆସନରେ ପ୍ରତିଦ୍ୱନ୍ଦ୍ୱିତା କରିବାକୁ ଏଏପି ଏବଂ କଂଗ୍ରେସ ଆଲୋଚନା କରିଥିଲେ। ଉଭୟ ଦଳ ମଧ୍ୟ ଜୋରଦାର ପ୍ରଚାର କରିବାରେ ବ୍ୟସ୍ତ ଅଛନ୍ତି। ଏଏପି ୩୧ଟି ଆସନ ପାଇଁ ପ୍ରାର୍ଥୀ ମଧ୍ୟ ଘୋଷଣା କରିଛି।
ଗତ ତିନିଟି ଲୋକ ସଭା ଏବଂ ଦିଲ୍ଲୀରେ ଦୁଇଟି ବିଧାନସଭା ନିର୍ବାଚନରେ କଂଗ୍ରେସ ନିଜର ଖାତା ଖୋଲିପାରି ନାହିଁ। ଆମ ଆଦମୀ ପାର୍ଟି ପ୍ରଥମେ ୬୭ ଏବଂ ପରେ ୬୨ଟି ଆସନରେ ବିଜୟୀ ହୋଇଥିଲା। ଏଥର ଲୋକସଭା ନିର୍ବାଚନରେ କଂଗ୍ରେସ ଏବଂ ଏଏପି ଏକାଠି ଲଢିଥିଲେ ମଧ୍ୟ ପୁଣିଥରେ ଭାଜପା ସମସ୍ତ ସାତୋଟି ଆସନ ଜିତିଥିଲା।
