ନୂଆଦିଲ୍ଲୀ, ୨୧।୬: ଭାରତର ଦୀର୍ଘତମ ସେତୁର ରାସ୍ତାରେ ଫାଟ ସୃଷ୍ଟି ହୋଇଛି । ଅଟଳ ବିହାରୀ ବାଜପେୟୀ ସେୱରି-ନହାଭ ସେବା ସେତୁ ନାମରେ ନାମିତ ଏହି ସେତୁକୁ ମୁମ଼୍ବାଇ ଟ୍ରାନ୍ସ ହାର୍ବର ଲିଙ୍କ୍ ବୋଲି ମଧ୍ୟ କୁହାଯାଏ । ଏହି ସେତୁର ପ୍ରସ୍ଥାନ ରାସ୍ତା ଅର୍ଥାତ ନଭି ମୁମ଼୍ବାଇ ଆଡ଼କୁ ପଡ଼ିଥିବା ରାସ୍ତାରେ ଫାଟ ଦେଖିବାକୁ ମିଳିଛି । ଏହି ସେତୁକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୫ ମାସ ପୂର୍ବେ ଉଦ୍ଘାଟନ କରିଥିଲେ ।
ଏହି ସେତୁର ରାସ୍ତାରେ ଫାଟକୁ ନେଇ ଏବେ ରାଜନୀତି ତେଜିଛି । ମହାରାଷ୍ଟ୍ର କଂଗ୍ରେସ ମୁଖ୍ୟ ନାନା ପାଟୋଲେ ଉକ୍ତ ସ୍ଥାନ ଗସ୍ତ କରି ସ୍ଥିତି ପରିଖିବା ସହିତ ଲୋକଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ଯେ, ମୁଁ ଏଠାକୁ ଆପଣଙ୍କୁ ଯାହା ଦେଖାଇବାକୁ ଆସିଛି ତାହା ଖାଲି ଅଭିଯୋଗ ନୁହେଁ । ରାଜ୍ୟ ସରକାର କହୁଛନ୍ତି ଆମେ ଲୋକଙ୍କ ପାଇଁ କାମ କରୁଛୁ । କିନ୍ତୁ ଆପଣମାନେ ଦେଖନ୍ତୁ ଏଠି କେଉଁଭଳି ଦୁର୍ନୀତି ହୋଇଛି । ଟଙ୍କା ନେଇ ସେମାନେ ନିଜର ପକେଟ୍ ଭର୍ତ୍ତି କରୁଛନ୍ତି । କିନ୍ତୁ ଲୋକଙ୍କ ଜୀବନକୁ ବିପଦରେ ପକାଇବାକୁ ସେମାନଙ୍କୁ କିଏ ଅଧିକାର ଦେଲା ବୋଲି ସେ ପ୍ରଶ୍ନ କରିଛନ୍ତି । ଏଥିସହିତ ଦୁର୍ନୀତିଗ୍ରସ୍ତ ସରକାରକୁ କିପରି ହଟାଯିବ ଜନତା ଏଥିପାଇଁ ଯୋଜନା କରନ୍ତୁ ବୋଲି ସେ କହିଛନ୍ତି ।
