ଅଗଷ୍ଟ ୧୫ ତାରିଖ, ଶନିବାର ୭୪ତମ ସ୍ବାଧୀନତା ଦିବସ ପାଳନ କରାଯିବ। କରୋନା କଟକଣା ସତ୍ତ୍ୱେ ଏହି ଦିବସ ପାଳନ ଲାଗି ଉତ୍ସାହ ଦେଖିବାକୁ ମିଳୁଛି। ବଜାରରେ ମଧ୍ୟ ବିଭିନ୍ନ ପ୍ରକାରର ସାମଗ୍ରୀ ଉପଲବ୍ଧ ହେବାରେ ଲାଗୁଛି। ଛୋଟ ଛୋଟ ତ୍ରିରଙ୍ଗାଠାରୁ ଆରମ୍ଭ କରି ତ୍ରିରଙ୍ଗା ବ୍ୟାଚ୍, ପଗଡ଼ି, ଟୋପି ଆଦି ବିକ୍ରି ହେଉଛି। ଏହାଛଡ଼ା କରୋନାକୁ ନେଇ ତ୍ରିରଙ୍ଗା ମାସ୍କ ମଧ୍ୟ ଉପଲବ୍ଧ ହେଉଥିବା ଦେଖିବାକୁ ମିଳୁଛି। ଏନେଇ ଅନେକ ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ମାସ୍କକୁ ନ ବ୍ୟବହାର କରିବାକୁ ସ୍ବର ଉଠୁଛି। ଏପରିକି ରାଜନୈତିକ ମହଲରେ ମଧ୍ୟ ଏହାର ଚର୍ଚ୍ଚା ହେଉଛି।
କଂଗ୍ରେସ ନେତା ଦିଗମ୍ବର କାମାତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ତ୍ରିରଙ୍ଗା ମାସ୍କକୁ ନିଷିଦ୍ଧ କରିବାକୁ ଅନୁରୋଧ କରିଛନ୍ତି। ସେ କହିଛନ୍ତି ବଜାରରେ ମିଳୁଥିବା ମାସ୍କରେ ଜାତୀୟ ପତାକାର ରଙ୍ଗ ସହ ଅଶୋକ ଚକ୍ର ଥିବା ଦେଖାଯାଉଛି। ଫଟୋ ଦେଖି ସେ ବହୁତ ଦୁଃଖି। ଏଭଳି ମାସ୍କକୁ ସମସ୍ତ ରାଜ୍ୟରେ ନିଷିଦ୍ଧ କରାଯାଉ ବୋଲି ସେ କହିଛନ୍ତି।
କହିରଖୁଛୁ, କେବଳ କଂଗ୍ରେସ ନୁହେଁ ଅନ୍ୟ ଦଳମାନେ ମଧ୍ୟ ଏହି ମାସ୍କର ବିକ୍ରିକୁ ବିରୋଧ କରୁଛନ୍ତି। ଝାରଖଣ୍ଡରେ ଏହାର ବିକ୍ରିକୁ ନିଷେଧ କରାଯାଇଛି। ହେଲେ ଅନ୍ୟାନ୍ୟ ଅଞ୍ଚଳରେ ଏହି ମାସ୍କ ୧୦ରୁ ୫୫୦ ଟଙ୍କା ଦରରେ ଉପଲବ୍ଧ ହେଉଛି।