ଜୟପୁର,୭।୩: ରାଜସ୍ଥାନର ବଂଶଓ୍ବାରାଠାରେ ଗୁରୁବାର ଆୟୋଜିତ ଭାରତ ଯୋଡୋ ନ୍ୟାୟ ଯାତ୍ରାର ସାଧାରଣ ସଭାରେ କଂଗ୍ରେସ ନେତା ରାହୁଲ ଗାନ୍ଧୀ ଯୁବ ନ୍ୟାୟ ପାଇଁ ପାଞ୍ଚଟି ବଡ ଗ୍ୟାରେଣ୍ଟି ଦେଇଛନ୍ତି। ଯଦି ଦଳ କେନ୍ଦ୍ରରେ ସରକାର ଗଠନ କରନ୍ତି ତେବେ ରାହୁଲ ଗାନ୍ଧୀ ଯୁବକମାନଙ୍କୁ ୩୦ ଲକ୍ଷ ସରକାରୀ ଚାକିରି ଯୋଗାଇଦେବାକୁ ଘୋଷଣା କରିଛନ୍ତି। ସେ ତାଙ୍କର ‘ଭାରତ ଯୋଡୋ ନ୍ୟାୟ ଯାତ୍ରା’ର ଏକ ଅଂଶ ଭାବରେ ବଂଶଓ୍ବାରାଠାରେ ଏକ ସାଧାରଣ ସଭାରେ ସମ୍ବୋଧିତ କରିଥିଲେ।
ଯୁବ, ଗରିବ ଏବଂ ଅନ୍ୟାନ୍ୟ ବିଭାଗ ପାଇଁ ଦଳର ପ୍ରସ୍ତାବିତ ପଦକ୍ଷେପ ସମ୍ପର୍କରେ ରାହୁଲ ଗାନ୍ଧୀ କହିଛନ୍ତି, ଆମେ ଗଣନା କରିଛୁ ଭାରତରେ ୩୦ ଲକ୍ଷ ସରକାରୀ ପଦବୀ ଖାଲି ଅଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୀ ତାହା ପୂରଣ କରୁନାହାଁନ୍ତି। ସରକାର ଆସିବା ପରେ, ଆମେ ପ୍ରଥମେ ୩୦ ଲକ୍ଷ ସରକାରୀ ଚାକିରି ଯୋଗାଇଦେବୁ।
ରାହୁଲ ଗାନ୍ଧୀ ଯୁବକମାନଙ୍କୁ ୫ ଗ୍ୟାରେଣ୍ଟି ଦେଇ କହିଛନ୍ତି, ଆମ ସରକାର ଆସିଲେ ଯୁବକମାନଙ୍କ ପାଇଁ ନିଯୁକ୍ତି ଟ୍ରଷ୍ଟ, ୩୦ ଲକ୍ଷ ଖାଲି ପଦବୀ ପୂରଣ, ପ୍ରଥମ ଚାକିରୀକୁ ନିଶ୍ଚିତ କରିବା, ପେପର ଲିକରୁ ମୁକ୍ତି, ଗିଗ କର୍ମଚାରୀଙ୍କ ପାଇଁ ସାମାଜିକ ସୁରକ୍ଷା ଏବଂ ‘ଯୁବ ରୋଶନି’ ଅଧୀନରେ ଥିବା ଜିଲାଗୁଡ଼ିକରେ ଷ୍ଟାର୍ଟଅପ ପାଇଁ ୫୦୦୦ କୋଟି ଟଙ୍କା ଯୋଗାଇଦେବୁ।
ରାହୁଲ ଗାନ୍ଧୀ ଏହା ମଧ୍ୟ କହିଛନ୍ତି ଯେ, କଂଗ୍ରେସ ପାର୍ଟିର ମନିଫେଷ୍ଟୋ ଚାଷୀଙ୍କୁ ସର୍ବନିମ୍ନ ସହାୟତା ମୂଲ୍ୟ (ଏମଏସପି) ପାଇଁ ଆଇନଗତ ଗ୍ୟାରେଣ୍ଟି ପ୍ରଦାନ କରିବାକୁ ପ୍ରତିଶୃତି ଦେଇଛି।