ଉଜ୍ଜୟିନୀ: ଉଜ୍ଜୟିନୀର ଶିପ୍ରା ନଦୀ କ୍ରମାଗତ ଭାବେ ପ୍ରଦୂଷିତ ହୋଇଚାଲିଛି। ନିକଟସ୍ଥ ବିଭିନ୍ନ ଡ୍ରେନର ଜଳ ଏହି ନଦୀରେ ମିଶୁଥିବାରୁ ଏହାର ପ୍ରଦୂଷଣର ମାତ୍ରା ବଢ଼ି ବଢ଼ି ଚାଲିଛି। ତେବେ ଏହି ପ୍ରସଙ୍ଗକୁ ଜନସାଧାରଣଙ୍କ ଦୃଷ୍ଟି ଆକର୍ଷଣ କରିବା ପାଇଁ କଂଗ୍ରେସର ଉଜ୍ଜୟିନୀ ଲୋକ ସଭା ଆସନର ପ୍ରାର୍ଥୀ ତଥା ତରାନା ବିଧାୟକ ମହେଶ ପରମାର ଏକ ନୂତନ ଉପାୟ ଆପଣାଇଛନ୍ତି। ସେ ଶିପ୍ରା ନଦୀର ଦୂଷିତ ଜଳରେ ବୁଡ଼ ପକାଇ ନିଜର ବିରୋଧ ପ୍ରଦର୍ଶନ କରିଛନ୍ତି। ଏହି ପ୍ରସଙ୍ଗରେ ପରମାର ଭାଜପାର କେନ୍ଦ୍ର ଓ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି। ଏଠାକାର ଏମ୍ପି, ବିଧାୟକ, ମେୟର, କାଉନସିଲର ପ୍ରମୁଖ ସମସ୍ତ ନିର୍ବାଚିତ ଜନପ୍ରତିନିଧୀ ଭାଜପାରୁ ଥିବା ବେଳେ ଶିପ୍ରା ନଦୀର ଶୋଚନୀୟ ଅବସ୍ଥା କାହିଁକି ସୁଧୁରିପାରୁନି ବୋଲି ସେ ପ୍ରଶ୍ନ କରିଛନ୍ତି। ଅଞ୍ଚଳର ବିକାଶ ପାଇଁ ମୁଖ୍ୟମନ୍ତ୍ରୀ ଡକ୍ଟର ମୋହନ ଯାଦବ ଅନେକ କୋଟି ଟଙ୍କା ବିନିଯୋଗ କରୁଥିବାବେଳେ ନଦୀ ପ୍ରଦୁଷଣ ପ୍ରତି ତାଙ୍କର ଦୃଷ୍ଟି ପଡୁନାହିଁ ବୋଲି ପରମାର ଅଭିଯୋଗ ଆଣିଛନ୍ତି। ନଦୀ ଶୁଦ୍ଧ ନ ହେବା ଯାଏ ଏବଂ ଏଥିରେ ଡ୍ରେନ୍ ପାଣି ଆସି ମିଶିବା ବନ୍ଦ ନ ହେବା ଯାଏ ତାଙ୍କର ଏହି ସଂଗ୍ରାମ ଜାରି ରହିବ ବୋଲି ପରମାର କହିଛନ୍ତି।
