ନୂଆଦିଲ୍ଲୀ,୧୯ ।୧୨: କଂଗ୍ରେର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଅଲୱରରେ ଖବରଦାତାଙ୍କ ସହ କଥା ହେବା ବେଳେ କହିଛନ୍ତି, ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରାରେ ଜନସମାଜ ଯୋଡି ହୋଇଛି । ରାହୁଲ ଗାନ୍ଧୀ ସବୁ ସମାଜକୁ ସାଙ୍ଗରେ ନେଇ ଚାଲୁଛନ୍ତି । ତେଣୁ ଲାଗୁଛି ୨୦୨୪ରେ ଲୋକ ସଭା ନିର୍ବାଚନ ଆମେ ଜିତିବୁ ।
ଖାର୍ଗେ ଚାଇନାର ଚାଲାକିକୁ ନେଇ କେନ୍ଦ୍ରର ଶାସକ ଭାରତୀୟ ଜନତା ପାର୍ଟି(ଭାଜପା) ସରକାରଙ୍କ ଉପରେ ପ୍ରଶ୍ନ ଉଠାଇଛନ୍ତି । ଖାର୍ଗେ କହିଥିଲେ ଚାଇନା ଆକ୍ରମଣ କରୁଛି ହେଲେ ସରକାର ଶାସକ ଦଳ ସହ ଚର୍ଚ୍ଚା କରିବାକୁ ବି ପ୍ରସ୍ତୁତ ନୁହେଁ । ସରକାର ଚାଇନାକୁ ନେଇ ଚର୍ଚ୍ଚା କରିବାକୁ ଭୟ କରୁଛନ୍ତି । ଅରୁଣାଚଳ ପ୍ରଦେଶରେ ଏତେ ବଡ ଘଟଣା ଘଟିଲା ହେଲେ ପ୍ରତିରକ୍ଷା ମନ୍ତ୍ରୀ ଗୋଟିଏ ଫର୍ଦ୍ଦର ବୟାନ ଦେଲେ । ଚାଇନାକୁ ନେଇ ସରକାର କ’ଣ କରୁଛନ୍ତି ତାହା ଆମକୁ ସରକାର ଜଣାଇବା ଦରକାର । ଆମ ନେତା ଯେତେବେଳେ ଚାଇନା ପ୍ରସଙ୍ଗକୁ ନେଇ ପ୍ରଶ୍ନ ଉଠାଇଲେ ଓଲଟା ଭାଜପା ନେତା ଆମକୁ ଟାର୍ଗେଟ କଲେ ଆମକୁ ପ୍ରଶ୍ନ ପଚାରିଲେ । ମୁଁ କହୁଛି ରାହୁଲ ଗାନ୍ଧୀ ଆଉ କଂଗ୍ରେସ ଦେଶ ସହ ରହିଛନ୍ତି । ସରକାର ଚାଇନାକୁ ନେଇ ଚର୍ଚ୍ଚା କାହିଁକି କରୁ ନାହାନ୍ତି । ଆମେ ଚାଇନା ଉପରେ ଆକ୍ରମଣ କରୁଛୁ ହେଲେ ସରକାର ପଳାୟନ କରୁଛନ୍ତି । ଖାର୍ଗେ ଆହୁରି ମଧ୍ୟ କହିଛନ୍ତି ସରକାର ମୂଷା ଭଳି ବ୍ୟବହାର କରୁଛନ୍ତି ।
