ନୂଆଦିଲ୍ଲୀ,୨୭।୪: କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଗୁରୁବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନେଇ ଏକ ବିବାଦୀୟ ବୟାନ ଦେଇଛନ୍ତି। ସେ କହିଛନ୍ତି, ‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ‘ବିଷଧର ସର୍ପ’ ଭଳି, ଆପଣ ଭାବୁ୍ଥିବେ ଏହା ବିଷ ନା ନାହିଁ, ଯଦି ଆପଣ ଏହାକୁ ଚାଟିଦେବେ, ତେବେ ଆପଣଙ୍କର ମୃତ୍ୟୁ ହେବ…।
କର୍ନାଟକରେ ମେ ୧୦ରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହାକୁ ଦୃଷ୍ଟିରେ ରଖି କଂଗ୍ରେସର ନିର୍ବାଚନ ପ୍ରଚାର ଅଭିଯାନରେ କଲବୁର୍ଗିରେ ଗୁରୁବାର ଜନତାଙ୍କୁ ସମ୍ବୋଧନ ଦେବା ଅବସରରେ ଖାର୍ଗେ ମୋଦିଙ୍କୁ ନେଇ ଏମିତି ବିବାଦୀୟ ବୟାନ ଦେଇଛନ୍ତି।
ଖାର୍ଗେଙ୍କ ଏହି ବୟାନର ଭିଡିଓକୁ ଭାଜପା ନେତା ଅମିତ ମାଲବିୟ ଟୁଇଟ କରିଛନ୍ତି ଓ କଂଗ୍ରେସକୁ ଟାର୍ଗେଟ କରିଛନ୍ତି। ସେ କହିଛନ୍ତି, ଏବେ କଂଗ୍ରେସ ଅଧ୍ୟକ୍ଷ ଖାର୍ଗେ ପ୍ରଧାନମନ୍ତ୍ରୀ ମୋଦିଙ୍କୁ ‘ବିଷଧର ସାପ’ ବୋଲି କହିଛନ୍ତି। ସୋନିଆ ଗାନ୍ଧୀଙ୍କ ‘ମୃତ୍ୟୁର ସୌଦାଗର’ରୁ ଯାହା ଆରମ୍ଭ ହୋଇଥିଲା ଓ ଏହାର ଶେଷ କେମିତି ହେଲା, ଆମେ ଜାଣିଛୁ, କଂଗ୍ରେସ ପ୍ରତିଥର ନୂଆ ସ୍ତରକୁ ଛୁଉଁଛି। ଏହି ନାଟକରୁ ଜଣାପଡୁଛି କି କଂଗ୍ରେସ କର୍ନାଟକରେ ମାଟିକୁ ହରାଉଛି।