ଭଦ୍ରକ ଅଫିସ, ୧୯।୧୨: ଭଦ୍ରକ କଚେରୀ ବଜାର ମୋଚି ଛକଠାରୁ ନଙ୍ଗାମହଲା, ଶଙ୍କରପୁର, ପୁରୁଣାବଜାର, ବାଙ୍କାବଜାର, ସଙ୍ଗତଛକଠାରୁ ଭଦ୍ରକାଳୀ ପୀଠ ପର୍ଯ୍ୟନ୍ତ ରାସ୍ତାର ଉଭୟପାର୍ଶ୍ୱରୁ ଜବରଦଖଲ ଉଚ୍ଛେଦ, ରାସ୍ତାର ପ୍ରଶସ୍ତୀକରଣ ଓ ସ୍ଥାୟୀ ନିର୍ମାଣ ପାଇଁ କଂଗ୍ରେସ ଦାବି କରିଛି। ଏନେଇ ଦଳ ପକ୍ଷରୁ ସୋମବାର ଜିଲାପାଳଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲାପାଳ ରାମଦାସ ଟୁଡୁଙ୍କୁ ଦାବିପତ୍ର ପ୍ରଦାନ କରାଯାଇଛି। ଭଦ୍ରକ ପୌରପାଳିକାର ୧୪ଟି ୱାର୍ଡର ପ୍ରାୟ ୬୦ହଜାର, ଗୁଜିଦରଡ଼ା, ଖଣ୍ଡତଡା ଓ ବେନ୍ତାଳ ପଞ୍ଚାୟତର ୩୫ ହଜାରରୁ ଊଦ୍ଧର୍ବ ଲୋକ ଦୈନନ୍ଦିନ ଏହି ରାସ୍ତାରେ ଯାତାୟାତ କରନ୍ତି। ରାସ୍ତାଟି ଅଣଓସାରିଆ ହୋଇଥିବାରୁ ଦମକଳ ଓ ଆମ୍ବୁଲାନ୍ସ ଯାତାୟାତରେ ବ୍ୟାଘାତ ସୃଷ୍ଟି ହେଉଛି।
ସେହିପରି ମା’ ଭଦ୍ରକାଳୀ ପୀଠକୁ ଯାଇଥିବା ରାସ୍ତା ଜବରଦଖଲ ଓ ଅଣଓସାରିଆ ଯୋଗୁ ଶ୍ରଦ୍ଧାଳୁମାନଙ୍କ ଯିବାଆସିବାରେ ସମସ୍ୟା ଦେଖାଦେଉଛି। ଏହି ରାସ୍ତାର ସ୍ଥାୟୀ ନିର୍ମାଣ ପାଇଁ ୨୦୧୮ରୁ ୫ କୋଟି ୨୦ ଲକ୍ଷ ଟଙ୍କା ମଞ୍ଜୁର ହୋଇ ଟେଣ୍ଡର ପ୍ରକ୍ରିୟା ହୋଇଥିଲେ ମଧ୍ୟ ଜବରଦଖଲ ଯୋଗୁ କାର୍ଯ୍ୟ ଆରମ୍ଭ ହୋଇପାରୁନାହିଁ। ଜବରଦଖଲ ଉଚ୍ଛେଦ କରି ରାସ୍ତା ପ୍ରଶସ୍ତୀକରଣ ଓ ନିର୍ମାଣ କାର୍ଯ୍ୟ ଆରମ୍ଭ କରାଯିବାକୁ କଂଗ୍ରେସ ପକ୍ଷରୁ ଅବଦୁଲ ମୋକିତ ଖାଁ, ଅସରଫ୍ ଅଲ୍ଲୀ ଖାଁ, ପୁଷ୍ପାରାଣୀ ନାୟକ, ବିଜୟ ବାରିକଙ୍କ ଅନ୍ୟ କର୍ମକର୍ତ୍ତା ଦାବି କରିଛନ୍ତି। ଦାବି ପୂରଣ ନ ହେଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି କଂଗ୍ରେସ ପକ୍ଷରୁ ଚେତାବନୀ ଦେଇଛନ୍ତି।