ସରଣ୍ଡା,୧୭।୪(ଡି.ଏନ.ଏ.): ବରଗଡ଼ ଜିଲା ଅତାବିରା ବ୍ଲକ କାଣ୍ଡପାଲିଠାରେ କଂଗ୍ରେସ ପକ୍ଷରୁ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଯାଇଛି। ଏଥିରେ ଜିଲା କଂଗ୍ରେସ ସଭାପତି ନିହାର ରଞ୍ଜନ ମହାନନ୍ଦ ଯୋଗଦେଇ ଅଭିଯୋଗ କରିଥିଲେ, ରେଙ୍ଗାଲିକ୍ୟାମ୍ପଠାରେ ଅତାବିରା ପୋଲିସ ପକ୍ଷରୁ ଶନିବାର ଏକ ସଚେତନତା ଶିବିର ଆୟୋଜନ କରାଯାଇଥିଲା। ଏଥିରେ ସବୁ ଦଳର ପ୍ରତିନିଧିଙ୍କୁ ନ ଡାକି କେବଳ ବିଜେଡି କର୍ମୀଙ୍କୁ ନେଇ ଆୟୋଜନ କରାଯାଇଥିଲା। ବିଜେଡିର ଜଣେ ଯୁବନେତାଙ୍କ ନାମରେ ଏନ୍ଏସି ନିର୍ବାଚନ ଦିନ ମାମଲା ରୁଜୁ ହୋଇ ତଦନ୍ତ ଚାଲିଥିବା ବେଳେ ତାଙ୍କୁ ଗିରଫ କରିବା ପରିବର୍ତ୍ତେ ପୋଲିସ ସାଙ୍ଗରେ ବସାଇ କି ସଚେତନତା ବାର୍ତ୍ତା ଦେଉଥିଲା ବୋଲି ମହାନନ୍ଦ ପ୍ରଶ୍ନ କରିଛନ୍ତି। ଖବରଦାତା ସମ୍ମିଳନୀରେ ଏନ୍ଏସି ସଭାପତି ଅଭିନାଶ ପ୍ରଧାନ, ଜିତୁ ଭୋଇ, ବଳରାମ ସାହୁ ପ୍ରମୁଖ ଉପସ୍ଥିତ ଥିଲେ। ଅନ୍ୟପକ୍ଷେ କଂଗ୍ରେସର ଏପରି ଅଭିଯୋଗକୁ ଭିତ୍ତିହୀନ ବୋଲି କହିଛନ୍ତି ଅତାବିରା ଆଇଆଇସି ଅନିଲ କୁମାର ପ୍ରଧାନ। ସେ କହିଛନ୍ତି, ଆମେ ସମସ୍ତଙ୍କୁ ଖବର ଦେଇଥିଲୁ। କିଏ ଆସିଲା ନ ଆସିଲା ସେଥିପାଇଁ ଆମ ପୋଲିସ ସମିତି ଦାୟୀ ନୁହଁ। ସାଇବର ଠକେଇ ଉପରେ ଶହ ଶହ ମହିଳା ପୁରୁଷ ସଚେତନ ହୋଇଛନ୍ତି। ସଚେତନତାମୂଳକ କାର୍ଯ୍ୟକ୍ରମରେ ସେମାନଙ୍କ ଏପରି ଅଭିଯୋଗ ଦୁର୍ଭାଗ୍ୟଜନକ ବୋଲି ଆଇଆଇସି ପ୍ରଧାନ କହିଛନ୍ତି। ଅନ୍ୟପଟେ ଅତାବିରା ସହର ଯୁବ ବିଜେଡି ସଭାପତି ସିଦ୍ଧାର୍ଥ ଶଙ୍କର ପଣ୍ଡା କହିଛନ୍ତି, କଂଗ୍ରେସର ଏପରି ଅଭିଯୋଗ ଭିତ୍ତିହୀନ। ଜଣଙ୍କ ନାଁରେ ଅଭିଯୋଗ ହୋଇଗଲେ ସେ ଦୋଷୀ ନୁହଁ। କଂଗ୍ରେସର ବିଜୟୀ କାଉନସିଲରଙ୍କ ନାଁରେ ବହୁ ଆପରାଧିକ ମାମଲାରେ ଚାର୍ଜସିଟ୍ ହୋଇଛି। ତେଣୁ ସେ ଇସ୍ତଫା ଦିଅନ୍ତୁ ବୋଲି ପଣ୍ଡା କହିଛନ୍ତି।
