ନୂଆଦିଲ୍ଲୀ,୧୬।୧୧: ବିହାର ବିଧାନସଭା ନିର୍ବାଚନରେ କଂଗ୍ରେସର ଖରାପ ପ୍ରଦର୍ଶନ ନେଇ ଏବେ ଦଳରେ ଚର୍ଚ୍ଚା ଆରମ୍ଭ ହୋଇଛି। ସେହିପରି ମଧ୍ୟପ୍ରଦେଶ, ଉତ୍ତରପ୍ରଦେଶ, ଗୁଜରାଟ ସମେତ ଅନ୍ୟ ରାଜ୍ୟରେ ହୋଇଥିବା ଉପନିର୍ବାଚନରେ ମଧ୍ୟ ଦଳର ପ୍ରଦର୍ଶନ ଭଲ ନାହିଁ। ମହାମେଣ୍ଟର ଅନ୍ୟ ସହଯୋଗୀ ଦଳ ମଧ୍ୟ କଂଗ୍ରେସର ପ୍ରଦର୍ଶନ ନେଇ ମୁହଁ ଖୋଲିଛନ୍ତି। ଏପରିସ୍ଥଳେ କଂଗ୍ରେସର ବରିଷ୍ଠ ନେତା କପିଲ ସିବଲ ଦଳରେ ନେତୃତ୍ୱ ପରିବର୍ତ୍ତନ ଉପରେ ପୁଣି ପ୍ରଶ୍ନ ଉଠାଇଛନ୍ତି। ସେ ଏକ ସାକ୍ଷାତ୍କାରରେ ହାଇକମାଣ୍ଡଙ୍କୁ ଆତ୍ମମନ୍ଥନ କରିବା ଲାଗି ପରାମର୍ଶ ଦେଇଛନ୍ତି। ଦେଶର ଜନସାଧାରଣ କଂଗ୍ରେସକୁ ଏକ ବଡ଼ ବିକଳ୍ପ ବୋଲି ଚିନ୍ତା କରୁ ନ ଥିବା ସେ କହିଛନ୍ତି। ଗତ ୬ ବର୍ଷ ଧରି କଂଗ୍ରେସ ହାଇକମାଣ୍ଡ ଦଳର ପ୍ରଦର୍ଶନ ନେଇ ଚିନ୍ତା କରୁ ନାହାଁନ୍ତି। ନେତୃତ୍ୱ ପରିବର୍ତ୍ତନ ନେଇ ଦଳରେ କୌଣସି ଆଲୋଚନା ହେଉ ନ ଥିବା ସେ କହିଛନ୍ତି। ସାଂଗଠନିକସ୍ତରକୁ ସୁଦୃଢ଼ କରାଗଲେ ଦଳ ପୁଣି ଆଗକୁ ଆସି ପାରିବ ବୋଲି ସିବଲ କହିଛନ୍ତି।