ବେଙ୍ଗାଲୁରୁ,୧୫।୨: କର୍ନାଟକରେ ଉଭୟ କଂଗ୍ରେସ ଓ ଭାଜପା ପରସ୍ପର ଉପରେ ଦୁର୍ନୀତି ଅଭିଯୋଗ କରୁଛନ୍ତି। କଂଗ୍ରେସ ଭାଜପା ସରକାରକୁ ଦୁର୍ନୀତିର ସରକାର ବୋଲି ଅଭିହିତ କରିଛି। ଏନେଇ ମୁଖ୍ୟମନ୍ତ୍ରୀ ବାସଭରାଜ ବୋମ୍ମାଇ କହିଛନ୍ତି, କଂଗ୍ରେସ ଏବଂ ଦୁର୍ନୀତି(କରପସନ୍)ଉଭୟ ସି’ରୁ ଆରମ୍ଭ ହୋଇଛି। ତେଣୁ ଉଭୟେ ସମାନ। ୬୦ରୁ ଅଧିକ ମାମଲାରେ ତାଙ୍କ ବିରୋଧରେ ଦୁର୍ନୀତି ଅଭିଯୋଗ ରହିଛି ଏବଂ ଲୋକାୟୁକ୍ତ ଏହି ମାମଲାଗୁଡ଼ିକର ଯାଞ୍ଚ କରୁଛନ୍ତି। କଂଗ୍ରେସ ସରକାର ସମୟରେ ଦୁର୍ନୀତି ଚରମ ସୀମାରେ ଥିଲା। ବର୍ତ୍ତମାନ ସମସ୍ତ ମାମଲାର ତଦନ୍ତ ପାଇଁ ଲୋକାୟୁକ୍ତକୁ ପଠାଯାଇଛି। ପ୍ରଥମେ ଦୁର୍ନୀତି ମାମଲା ଉପରେ ସେମାନେ ଜବାବ ଦିଅନ୍ତୁ।
ସୂଚନାଯୋଗ୍ୟ, ଚଳିତ ବର୍ଷ କର୍ନାଟକରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ବିରୋଧୀ ଦଳ କଂଗ୍ରେସ ଦୁର୍ନୀତି ପ୍ରସଙ୍ଗରେ ଭାଜପା ସରକାରକୁ ଘେରିବାକୁ ଚେଷ୍ଟା କରୁଛି। ସରକାର ଦୁର୍ନୀତିକୁ ପ୍ରୋତ୍ସାହିତ କରୁଥିବା ଅଭିଯୋଗ କରି ଭାଜପା ବିରୋଧରେ ଅଭିଯାନ ଆରମ୍ଭ କରିଛି। କଂଗ୍ରେସ ଅଭିଯୋଗ କରିଛି, ଭାଜପା ସରକାରରେ ବିକାଶ କାର୍ଯ୍ୟ ପାଇଁ ୪୦ ପ୍ରତିଶତ କମିଶନ ନିଆଯାଇଛି। କଂଗ୍ରେସର ଅଭିଯୋଗକୁ ଘେରି ରହିଥିବା ବେଳେ ଭାଜପା ମଧ୍ୟ କଂଗ୍ରେସ ସରକାରରେ ହୋଇଥିବା ଦୁର୍ନୀତିକୁ ପ୍ରସଙ୍ଗ କରିଛି ଏବଂ ଉଭୟ ଦଳ ପରସ୍ପରକୁ ଦୋଷ ଦେବାରେ ବ୍ୟସ୍ତ ଅଛନ୍ତି।