ଜୟପୁର,୧୨।୪: ମୁଖ୍ୟମନ୍ତ୍ରୀ ଅଶୋକ ଗେହଲଟ ଏବଂ କଂଗ୍ରେସ ନେତା ସଚିନ ପାଇଲଟଙ୍କ ମଧ୍ୟରେ ମତଭେଦ ପୁଣି ଥରେ ସାମ୍ନାକୁ ଆସିବା ପରେ ରାଜସ୍ଥାନରେ ଏକ ବଡ଼ ପରିବର୍ତ୍ତନ ପାଇଁ କଂଗ୍ରେସ ପ୍ରସ୍ତୁତି ଚଳାଇଛି। ସୂଚନାନୁସାରେ, ଅଶୋକ ଗେହଲଟ ଏବଂ ସଚିନ ପାଇଲଟଙ୍କ ମଧ୍ୟରେ ହୋଇଥିବା ବିବାଦକୁ ଦୂର କରିବା ଏବଂ ଦଳରେ ଏକତା ଫେରାଇ ଆଣିବା ପାଇଁ ଏକ ବଡ଼ ପରିବର୍ତ୍ତନ କରାଯିବ।
ସୂତ୍ରରୁ ପ୍ରକାଶ ଯେ, କଂଗ୍ରେସ ନେତୃତ୍ୱ ୨୦୨୧ରେ ପଞ୍ଜାବରେ ହୋଇଥିବା ଭୁଲକୁ ପୁନରାବୃତ୍ତି କରିବାକୁ ଚାହୁଁନାହାଁନ୍ତି। ସେଠାରେ ପୂର୍ବତନ ମୁଖ୍ୟମନ୍ତ୍ରୀ ଅମରିନ୍ଦର ସିଂ ବିଧାନସଭା ନିର୍ବାଚନର କିଛି ମାସ ପୂର୍ବରୁ ଦଳ ଛାଡି ନିଜର ଏକ ସଂଗଠନ ଗଠନ କରିଥିଲେ।
କଂଗ୍ରେସ ନେତା ସଚିନ ପାଇଲଟ ମଙ୍ଗଳବାର ରାଜସ୍ଥାନରେ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ବିରୋଧରେ ଅନଶନ କରିଥିଲେ। ପାଇଲଟ ଅଭିଯୋଗ କରିଛନ୍ତି ଯେ ବସୁନ୍ଧରା ରାଜେଙ୍କ ସମୟରେ ଘଟିଥିବା ଦୁର୍ନୀତି ମାମଲାକୁ ଗେହଲଟ ସରକାର ଅବହେଳା କରିଛନ୍ତି। ତେବେ ରାଜସ୍ଥାନରେ ଅଶୋକ ଗେହଲଟ ଏବଂ ସଚିନ ପାଇଲଟଙ୍କ ମଧ୍ୟରେ ଥିବା ତିକ୍ତତା ଉପରେ କଂଗ୍ରେସ ନେତୃତ୍ୱ ନଜର ରଖିଛନ୍ତି। ଦଳର ନେତୃତ୍ୱ ଖୁବ୍ଶୀଘ୍ର ଏଥିରେ ହସ୍ତକ୍ଷେପ କରିବାକୁ ନିଷ୍ପତ୍ତି ନେଇଛି।