ପଦ୍ମପୁର,୨୭।୧୧(ଡି.ଏନ.ଏ.): ରାଜ୍ୟରେ ୨୨ ବର୍ଷ ହେଲା ବିଜୁ ଜନତା ଦଳ ସରକାର ଶାସନ କରୁଛି। ୨୦୦୦ରୁ ୨୦୦୯ ଭାଜପା-ବିଜେଡି କ୍ଷମତାରେ ଥିବାବେଳେ ପଦ୍ମପୁରର ବିକାଶ କଲେନାହିଁ। ଏବେ ନିର୍ବାଚନ ଥିବାରୁ ସେମାନେ ବିକାଶର କଥା କହୁଛନ୍ତି। ଏହି ଉପନିର୍ବାଚନରେ କଂଗ୍ରେସ ଏକମାତ୍ର ବିକଳ୍ପ ଦଳ ବୋଲି ଶନିବାର ପଦ୍ମପୁରର ଏକ କଲ୍ୟାଣ ମଣ୍ଡପରେ ପିସିସି ସଭାପତି ଶରତ ପଟ୍ଟନାୟକ ଖବରଦାତା ସମ୍ମିଳନୀକୁ ସମ୍ବୋଧନ କରି କହିଛନ୍ତି। ଉପନିର୍ବାଚନରେ ସତ୍ୟର ଜୟ ହେବ ଏବଂ ପଦ୍ମପୁର ଭୋଟର କଂଗ୍ରେସ ପ୍ରାର୍ଥୀଙ୍କୁ ବିପୁଳ ସଂଖ୍ୟାରେ ଭୋଟ ଦେବେ ବୋଲି ପଟ୍ଟନାୟକ କହିଥିଲେ। ଏହାସହ ବିଧାୟକ ପ୍ରାର୍ଥୀ ସତ୍ୟଭୂଷଣ ସାହୁ ଜାରି କରିଥିବା ୧୩ ସୂତ୍ରୀ ନିର୍ବାଚନ ପ୍ରତିଶ୍ରୁତି ସମ୍ପର୍କରେ ସେ ସୂଚନା ଦେଇଥିଲେ। ପଦ୍ମପୁରକୁ ଜିଲା ମାନ୍ୟତା, ଧାନର ଏମ୍ଏସ୍ପି ୨୬୦୦ ଟଙ୍କା ସହିତ ବୀମାରାଶି ପ୍ରଦାନ ପାଇଁ ପ୍ରଚେଷ୍ଟା ଜାରି ରହିବ। ଅଙ୍ଗ ନଦୀରେ ବ୍ୟାରେଜ, ବରଗଡ଼-ନୂଆପଡା ରେଳ ଲାଇନ ଭାୟା ପଦ୍ମପୁର ପାଇଁ ଦାବି ଜୋର କରାଯିବ ବୋଲି ସେ କହିଥିଲେ। ଖବରଦାତା ସମ୍ମିଳନୀରେ ପୂର୍ବତନ ପିସିସି ସଭାପତି ଜୟଦେବ ଜେନା, ନିରଞ୍ଜନ ପଟ୍ଟନାୟକ, ପୂର୍ବତନ ମନ୍ତ୍ରୀ ଜଗନ୍ନାଥ ପଟ୍ଟନାୟକ, ପଞ୍ଚାନନ କାନୁନ୍ଗୋ, ଗଣେଶ୍ୱର ବେହେରା ଓ ପୂର୍ବତନ ଏମ୍ପି ସଞ୍ଜୟ ଭୋଇ ଉପସ୍ଥିତ ଥିଲେ।
