କୋଲକତା,୨୮।୯: କଂଗ୍ରେସର ପଶ୍ଚିମବଙ୍ଗ ସଭାପତି ଆଧୀର ରଂଜନ ଚୌଧୁରୀ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ନିକଟରେ ହୋଇଥିବା ବିଦେଶ ଗସ୍ତକୁ ନେଇ ତାଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ରାଜ୍ୟରେ ପୁଞ୍ଜି ନିବେଶକୁ ଆକର୍ଷିତ କରିବା ନାମରେ ଟିକସଦାତାଙ୍କ ଟଙ୍କାକୁ ଅପବ୍ୟବହାର କରୁଛନ୍ତି। ସେ ଆହୁରି ମଧ୍ୟ ଦାବି କରିଛନ୍ତି ଯେ, ବିଦେଶ ଗସ୍ତ ସମୟରେ ମମତା ଏକ ହୋଟେଲରେ ରହିଥିଲେ ଯେଉଁଠାରେ ଦୈନିକ ତାଙ୍କୁ ୩ଲକ୍ଷ ଟଙ୍କା ଦେବାକୁ ପଡୁଥିଲା।
ଏହି ମାସ ଆରମ୍ଭରେ ମୁଖ୍ୟମନ୍ତ୍ରୀ ବାନାର୍ଜୀ ରାଜ୍ୟରେ ପୁଞ୍ଜି ନିବେଶ ପାଇଁ ନିବେଶକଙ୍କୁ ଆକର୍ଷିତ କରିବା ପାଇଁ୧୨ ଦିନିଆ ସ୍ପେନ ଓ ଦୁବାଇ ଗସ୍ତରେ ଯାଇଥିଲେ। ତେବେ ସେ ୨୩ ସେପ୍ଟେମ୍ବରରେ କୋଲକାତା ଫେରିଥିଲେ। ଗଣମାଧ୍ୟମକୁ ଏକ ସାକ୍ଷାତକାର ନେଇ ଅଧୀର କହିଛନ୍ତି, ମମତା ବିଦେଶ ଗସ୍ତ ସମୟରେ ଏକ ହୋଟେଲରେ ରହିଥିଲେ। ଯେଉଁଠାରେ ଦିନକୁ ଖର୍ଚ୍ଚ ୩ଲକ୍ଷ ଟଙ୍କା ହୋଇଥିଲା। କେବଳ ମୁଖ୍ୟମନ୍ତ୍ରୀ ଏବଂ ତାଙ୍କ ପରିବାର ସଦସ୍ୟ ନୁହଁନ୍ତି ଅନେକ ନିବେଶକାରୀ ମଧ୍ୟ ଆମ ରାଜ୍ୟର ପାଣ୍ଠିର ଅପବ୍ୟବହାର କରି ନିବେଶ ଆଣିବା ନାମରେ ସ୍ପେନକୁ ଯାଇ ମଉଜ ମଜଲିସ କରିବା ସହ ଦର୍ଶନୀୟ ସ୍ଥାନ ବୁଲି ଫେରୁଛନ୍ତି।
