ମେଙ୍ଗାଲୁରୁ,୧୩ ।୯: ପୂର୍ବତନ କେନ୍ଦ୍ରମନ୍ତ୍ରୀ ତଥା କଂଗ୍ରେସ ନେତା ଓସ୍କାର ଫର୍ଣ୍ଣାଡେଜଙ୍କ ସୋମବାର ପରଲୋକ ହୋଇଛି । କର୍ନାଟକର ମେଙ୍ଗାଲୁରୁରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ୮୦ ବର୍ଷିୟ ଫର୍ଣ୍ଣାଡେଜ କିଛି ଦିନ ହେବ ଅସୁସ୍ଥ ଥାଇ ମେଙ୍ଗାଲୁରୁର ଏକ ହସ୍ପିଟାଲରେ ଚିକିତ୍ସିତ ହେଉଥିଲେ । ଚଳିତ ବର୍ଷ ଯୋଗ କରିବା ସମୟରେ ସେ ଆହତ ହୋଇଥିଲେ । ତା’ପରଠରୁ ତାଙ୍କର ସ୍ୱାସ୍ଥ୍ୟାବସ୍ଥା ବିଗିଡିବାରେ ଲାଗିଥିଲା ।
ଓସ୍କାର ଫର୍ଣ୍ଣାଡେଜ ଗାନ୍ଧୀ ପରିବାରର ଘନିଷ୍ଠ ଥିଲେ । ସୋନିଆ ଗାନ୍ଧୀ, ରାହୁଲ ଗାନ୍ଧୀଙ୍କ ସହ ତାଙ୍କର ଓ ସୁସମ୍ପର୍କ ଥିଲା । ସେ ଉପା ସରକାର ସମୟରେ ସଡ଼କ ଓ ପରିବହନ ମନ୍ତ୍ରୀ ଥିଲେ । ବର୍ତ୍ତମାନ ସେ ରାଜ୍ୟ ସଭାର ଏମ୍ପି ଥିଲେ । ଉପା ସରକାରର ଦୁଇଟି ଯାକ କାର୍ଯ୍ୟକାଳ ମଧ୍ୟରେ ଫର୍ଣ୍ଣାଡେଜ ମନ୍ତ୍ରୀ ରହିବା ସହ ଲମ୍ବା ସମୟ ଧରି ଗାନ୍ଧୀ ପରିବାର ସହ କାମ କରିଥିଲେ । ରାଜୀବ ଗାନ୍ଧୀଙ୍କ ସଂସଦୀୟ ସଚିବ ଥିଲେ ଫର୍ଣ୍ଣାଡେଜ । କର୍ନାଟକର ଉଡ୍ଡପି ଲୋକ ସଭା ଆସନରୁ ୧୯୮୦ରେ ଏମ୍ପି ଭାବେ ନିର୍ବାଚତ ହୋଇଥିଲେ । ଏହାପରେ ୧୯୯୬ରେ ସେ ଲଗାତାର ଭାବେ ବିଜୟୀ ହୋଇ ଆସୁଥିଲେ । ୧୯୯୮ରେ କଂଗ୍ରେସ ତାଙ୍କୁ ରାଜ୍ୟ ସଭାକୁ ପଠାଇଥିଲା । ସେବେଠାରୁ ସେ ରାଜ୍ୟ ସଭାର ସଦସ୍ୟ ହୋଇ ରହିଥିଲେ । ଓସ୍କାର ଫର୍ଣ୍ଣଡେଜଙ୍କ ଜନ୍ମ ୨୭ ମାର୍ଚ୍ଚ ୧୯୪୧ରେ କର୍ନାଟକର ଉଡ୍ଡପିରେ ହୋଇଥିଲା । ପରିବାରର ୧୨ ସନ୍ତାନଙ୍କ ମଧ୍ୟରୁ ସେ ଥିଲେ ଜଣେ ।
