ନୂଆଦିଲ୍ଲୀ,୨୩।୨: ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ କଂଗ୍ରେସ ମିଡିଆ ବିଭାଗର ମୁଖ୍ୟ ପବନ ଖେରାଙ୍କୁ ଦ୍ୱାରିକା କୋର୍ଟରୁ ଜାମିନ ମିଳିଛି। ଏହାପୂର୍ବରୁ ସୁପ୍ରିମକୋର୍ଟ ପବନଙ୍କୁ ଅନ୍ତରୀଣ ଜାମିନରେ ମୁକ୍ତ କରିବାକୁ ନିର୍ଦ୍ଦେଶ ଦେଇଥିଲେ। ଗୁରୁବାର ଦିଲ୍ଲୀ ବିମାନବନ୍ଦରରୁ ଆସାମ ପୋଲିସ ତାଙ୍କୁ ଗିରଫ କରିଥିଲା। ଖେରାଙ୍କ ବିରୋଧରେ ଅନେକ ଏଫ୍ଆଇଆର କ୍ଲବ କରିବା ପାଇଁ କୋର୍ଟ ଆସାମ ଏବଂ ଉତ୍ତରପ୍ରଦେଶ ସରକାରଙ୍କଠାରୁ ଜବାବ ମାଗିଛନ୍ତି। ସୁପ୍ରିମକୋର୍ଟରେ ଏହି ମାମଲାର ପରବର୍ତ୍ତୀ ଶୁଣାଣି ସୋମବାର ଅର୍ଥାତ୍ ଫେବୃଆରୀ ୨୭ରେ ହେବ। ସୂଚନା ମୁତାବକ, ଗଣତାନ୍ତ୍ରିକ ଉପାୟରେ ନିର୍ବାଚିତ ପ୍ରଧାନମନ୍ତ୍ରୀଙ୍କ ବିରୋଧରେ ପବନ ଖେରା ଅପମାନଜନକ ମନ୍ତବ୍ୟ ବ୍ୟବହାର କରିଛନ୍ତି। ପବନ ଖେରାଙ୍କ ବିରୋଧରେ ଦାଖଲ ହୋଇଥିବା ଏଫ୍ଆଇଆରରେ ଗିରଫଦାରୀରୁ ସୁରକ୍ଷା ପାଇଁ ଦାଖଲ ହୋଇଥିବା ରିଟ୍ ପିଟିସନର ଉତ୍ତର ଦେବାକୁ ଚାହୁଁଛି ବୋଲି ଆସାମ ପୋଲିସ ସୁପ୍ରିମକୋର୍ଟରେ କହିଛି। ଅନ୍ୟପଟେ ପ୍ରଧାନମନ୍ତ୍ରୀଙ୍କ ଉପରେ ଦେଇଥିବା ନିଜ ମନ୍ତବ୍ୟ ପାଇଁ ପବନ କ୍ଷମା ପ୍ରାର୍ଥନା କରିଛନ୍ତି ବୋଲି ତାଙ୍କ ଓକିଲ କୋର୍ଟରେ କହିଛନ୍ତି। ତାଙ୍କ ବିରୋଧରେ କରାଯାଇଥିବା ଅଭିଯୋଗରେ ଗିରଫଦାରୀର କୌଣସି ଆବଶ୍ୟକତା ନାହିଁ ବୋଲି ଓକିଲ କହିଛନ୍ତି।
