ନୂଆଦିଲ୍ଲୀ,୨୫।୧୧:ଦେଶର ସର୍ବ ପୁରାତନ ରାଜନୈତିକ ଦଳ କଂଗ୍ରେସ ଗତ ଦୁଇ ଦିନ ମଧ୍ୟରେ ଦୁଇଟି ଗଭୀର ଆଘାତ ପାଇଛି। ଗତ ସୋମବାର ଆସାମର ପୂର୍ବତନ ମୁଖ୍ୟମନ୍ତ୍ରୀ ତରୁଣ ଗୋଗୋଇଙ୍କ ମୃତ୍ୟୁ ପରେ ଆଜି ଅର୍ଥାତ୍ ବୁଧବାର ଭେଟେରାନ କଂଗ୍ରେସ ନେତା ଅହମଦ ପଟେଲଙ୍କ ପରଲୋକ ଘଟିଛି। ଉଭୟ ନେତାଙ୍କୁ କଂଗ୍ରେସର ସବୁଠାରୁ ବିଶ୍ୱସ୍ତ ନେତା ଭାବରେ ଜଣାଶୁଣା ଥିଲେ। ଉଭୟଙ୍କୁ ଗାନ୍ଧୀ ପରିବାରର ନିକଟତମ ବିବେଚନା କରାଯାଉଥିଲା। ଅତୀତରେ ତରୁଣ ଗୋଗୋଇ କଂଗ୍ରେସର ଦୁର୍ଗକୁ ଦୀର୍ଘ ସମୟ ଧରି ରଖିଥିଲେ। ସେତେବେଳେ ଅହମଦ ପଟେଲ ପଶ୍ଚିମ ଏବଂ ଉତ୍ତର ଭାରତରେ ମଧ୍ୟ ସମାନ କାର୍ଯ୍ୟ କରୁଥିଲେ, କିନ୍ତୁ ଏବେ ଦୁହେଁ ଏହି ଦୁନିଆକୁ ବିଦାୟ ଦେଇଛନ୍ତି।
ଆସାମର ପୂର୍ବତନ ମୁଖ୍ୟମନ୍ତ୍ରୀ ତରୁଣ ଗୋଗୋଇ ପ୍ରାୟ ପାଞ୍ଚ ଦଶନ୍ଧି ଧରି ରାଜନୀତିରେ ସକ୍ରିୟ ଥିଲେ। ସେ ଇନ୍ଦିରା ଗାନ୍ଧୀ, ରାଜୀବ ଗାନ୍ଧୀ, ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ସହ କାମ କରିଥିଲେ। ପ୍ରତ୍ୟେକ ଥର ଗାନ୍ଧୀ ପରିବାର ତାଙ୍କ ଉପରେ ବିଶ୍ୱାସ ପ୍ରକାଶ କରିଥିଲେ। ସେହିପରି ଗୁଜୁରାଟରୁ ଆସିଥିବା ଅହମଦ ପଟେଲଙ୍କୁ କଂଗ୍ରେସ ଦଳର ଚାଣକ୍ୟ ଭାବେ ବିବେଚନା କରାଯାଉଥିଲା। ଅହମ୍ମଦ ପଟେଲ ରାଜୀବ ଗାନ୍ଧୀଙ୍କ ଦେହାନ୍ତ ପରେ ଦୀର୍ଘ ଦିନ ଧରି ସୋନିଆ ଗାନ୍ଧୀଙ୍କ ଜଣେ ରାଜନୈତିକ ପରାମର୍ଶଦାତା ଥିଲେ। ଏବେ କଂଗ୍ରେସ ଦଳରେ ଗୋଷ୍ଠୀ କନ୍ଦଳ ଦେଖାଯାଇଥିବାବେଳେ ଏହି ଦୁଇ ନେତାଙ୍କ ପରଳୋକ ଦଳକୁ ବହୁ କ୍ଷତି ପହଞ୍ଚାଇବ ବୋଲି ରାଜନୈତିକ ମହଲରେ ଆଲୋଚନା ହେଉଛି।
