ଭୁବନେଶ୍ୱର, ୧୧।୩:(ସୁନିତ୍ ମିଶ୍ର) ୨୦୨୪ ନିର୍ବାଚନ ତାରିଖ କୌଣସି ସମୟରେ ଘୋଷଣା ହୋଇଯାଇପାରେ। ଏହା ପୂର୍ବରୁ ସବୁ ଦଳ ବର୍ତ୍ତମାନ ଉଭୟ ବିଧାନସଭା ଏବଂ ଲୋକ ସଭା ନିର୍ବାଚନ ପାଇଁ ପ୍ରାର୍ଥୀ ଚୟନ କରିବାରେ ବ୍ୟସ୍ତ ହୋଇଗଲେଣି। ବିଜେଡି-ଭାଜପା ମେଣ୍ଟ ହେବାକୁ ଥିବାରୁ ଉଭୟ ଦଳ ମଧ୍ୟରେ ଆସନ ବୁଝାମଣା ନ ହେବା ପର୍ଯ୍ୟନ୍ତ ପ୍ରାର୍ଥୀ ଚୟନ ହୋଇପାରିବ ନାହିଁ। ଏପରି ସ୍ଥିତିରେ ମାର୍ଚ୍ଚ ପ୍ରଥମ ସପ୍ତାହ ସୁଦ୍ଧା ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିବାକୁ ଥିବା କଂଗ୍ରେସ ଏହି କାର୍ଯ୍ୟରେ ବିଳମ୍ବ କରିଦେଇଛି।
ଗତ ୯ ତାରିଖରେ ଦିଲ୍ଲୀରେ କଂଗ୍ରେସର ଦ୍ୱିତୀୟ ପର୍ଯ୍ୟାୟ ସ୍କ୍ରିନିଂ କମିଟି ବୈଠକ ହୋଇଥିବା ବେଳେ ଏଥିରେ ପିସିସି ସଭାପତି ଶରତ ପଟ୍ଟନାୟକଙ୍କ ସମେତ ଓଡ଼ିଶା ପ୍ରଭାରୀ ଅଜୟ କୁମାର ମଧ୍ୟ ଯୋଗ ଦେଇଥିଲେ। ହେଲେ ଆଗକୁ ଆଉଥରେ ସ୍କ୍ରିନିଂ କମିଟି ବସିବ ବୋଲି ପିସିସି ସଭାପତି ସୂଚନା ଦେଇଛନ୍ତି। ଆସନ୍ତା ୧୯ ତାରିଖରେ ତୃତୀୟ ପର୍ଯ୍ୟାୟ ସ୍କ୍ରିନିଂ କମିଟି ବସିବା ପରେ ପ୍ରାର୍ଥୀ ତାଲିକା ଚୂଡାନ୍ତ ହେବ ବୋଲି ଜଣାପଡ଼ିଛି।
ଅନ୍ୟପଟେ ଶରତ ପଟ୍ଟନାୟକ ରବିବାର ଦିଲ୍ଲୀରୁ ଓଡ଼ିିଶା ଫେରି ଆସିଛନ୍ତି। ଏଭଳି ସ୍ଥିତିରେ ବିଜେଡି-ଭାଜପା ମେଣ୍ଟରୁ ଫାଇଦା ନେବା ସକାଶେ କଂଗ୍ରେସ ଆଉ ଏକ ଯୋଜନା କରିଛି। ବିଜେଡି-ଭାଜପାର ମେଣ୍ଟ ହେବା ପରେ ଯେଉଁମାନଙ୍କ ଟିକେଟ କଟିବ କିମ୍ବା ଯେଉଁମାନେ ଅସନ୍ତୁଷ୍ଟ ହେବେ, ସେମାନଙ୍କ ମଧ୍ୟରୁ ୭୦ରୁ ୮୦ ପ୍ରତିଶତଙ୍କୁ ଆସନ୍ତା ନିର୍ବାଚନରେ ପ୍ରାର୍ଥୀ କରିବା ଉପରେ ସମ୍ପୂର୍ଣ୍ଣ ଧ୍ୟାନ ଦେବାକୁ କୁଆଡେ ଅଖିଳ ଭାରତ କଂଗ୍ରେସ କମିଟି(ଏଆଇସିସି)ର ଶୀର୍ଷ ନେତୃତ୍ୱ ନିର୍ଦ୍ଦେଶ ଦେଇଥିବା ସେ କହିଛନ୍ତି।