ଭୋପାଳ,୫।୧୨: ମଧ୍ୟପ୍ରଦେଶ ବିଧାନସଭା ନିର୍ବାଚନରେ ଭାଜପା ୫୦ ସିଟ୍ରେ ଜିତିଲେ ମୁହଁକଳା କରିବେ ବୋଲି କହିଥିଲେ କଂଗ୍ରେସ ବିଧାୟକ ଫୁଲ ସିଂ ବରେୟା। ଏବେ ତାହା ହୋଇଥିବା ଯୋଗୁ ସେ ତାଙ୍କର ପ୍ରତିଜ୍ଞାକୁ ପାଳନ କରିବେ ବୋଲି କହି ଚର୍ଚ୍ଚାକୁ ଆସିଛନ୍ତି। ରାଜ୍ୟର ଦତ୍ତିଆ ଜିଲାର ଭନ୍ଦର ବିଧାନସଭା ଆସନରୁ କଂଗ୍ରେସ ଟିକେଟରେ ନିର୍ବାଚିତ ହୋଇଥିବା ଫୁଲ ସିଂ ଡିସେମ୍ବର ୭ ଅପରାହ୍ନ ୨ଟାରେ ରାଜଭବନ ସମ୍ମୁଖରେ ମୁହଁ କଳା କରିବେ ବୋଲି ସ୍ପଷ୍ଟ କରିଛନ୍ତି।
ଏକ ନ୍ୟୁଜ ଏଜେନ୍ସିକୁ ପ୍ରତିକ୍ରିୟା ଦେଇ କଂଗ୍ରେସ ବିଧାୟକ କହିଛନ୍ତି, ‘ମୁଁ ମୋର ପ୍ରତିଜ୍ଞାରେ ଅଟଳ। ତଥାପି ମୁଁ ଏହା ସ୍ପଷ୍ଟ କରିଦେବାକୁ ଚାହେଁ ଯେ ଯଦି ନିର୍ବାଚନ ଆୟୋଗ ନିରପେକ୍ଷ ଭାବେ ନିର୍ବାଚନ କରାନ୍ତି ତେବେ ଲିଖିତ ଭାବେ କହିପାରେ ଯେ ରାଜ୍ୟରେ ଭାଜପା ପାଖରେ ୫୦ ବିଧାୟକଙ୍କୁ ଜିତାଇବା ଲାଗି ପର୍ଯ୍ୟାପ୍ତ ଭୋଟ୍ ନାହିଁ। ଯଦି ଦେଶ, ଗଣତନ୍ତ୍ର ଏବଂ ସମ୍ବିଧାନକୁ ବଞ୍ଚାଇବା ଲାଗି ରକ୍ତ ଝରାଇ ମୁହଁକୁ ଲାଲ କରିବାକୁ ପଡେ ତେବେ ଆମେ କରିବୁ। ମୁଁ ଡିସେମ୍ବର ୭ରେ ପ୍ରତିଶ୍ରୁତି ପୂରଣ କରିବି।’
କହିରଖୁଛୁ, ମଧ୍ୟପ୍ରଦେଶ ବିଧାନସଭା ନିର୍ବାଚନରେ ଭାଜପା ବହୁମତ ହାସଲ କରିଛି। ରାଜ୍ୟର ୨୩୦ ଆସନରୁ ଭାଜପା ହାତକୁ ଯାଇଛି ୧୬୩ ଆସନ। ସେହିଭଳି କଂଗ୍ରେସ ମାତ୍ର ୬୬ ଆସନରେ ସନ୍ତୁଷ୍ଟ ହୋଇଛି। ଏବେ ଭାଜପା ରାଜ୍ୟରେ ସରକାର ଗଠନ କରିବାକୁ ଯାଉଥିବା ବେଳେ କଂଗ୍ରେସ ବିଧାୟକଙ୍କ ଏଭଳି ମନ୍ତବ୍ୟ ଚର୍ଚ୍ଚାର ପରିସରକୁ ଆସିଛି।
