ଜୟପୁର,୨୩।୧୧: ରାଜସ୍ଥାନରେ ବିଧାନସଭା ନିର୍ବାଚନ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦୁର୍ବ୍ୟବହାର କରିବାକୁ ନେଇ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଅସନ୍ତୋଷ ବ୍ୟକ୍ତ କରିଛନ୍ତି। ସେ କହିଛନ୍ତି, ରାଜସ୍ଥାନରେ ମୋଦିଜୀଙ୍କୁ ଦୁର୍ବ୍ୟବହାର କରାଯାଇଛି, ଯେତେବେଳେ ବି ପ୍ରଧାନମନ୍ତ୍ରୀ ମୋଦିଙ୍କୁ ଦୁର୍ବ୍ୟବହାର କରାଯାଏ, ସେତେବେଳେ ଜନସାଧାରଣ ଏହାର ପ୍ରତିକ୍ରିୟା ରଖନ୍ତି। ରାଜସ୍ଥାନରେ ମଧ୍ୟ ଜନତା ତା’ର ଜବାବ ଦେବେ। ଏଥର ଏଠାରେ କଂଗ୍ରେସ ସରକାର ହଟିବ ଏବଂ ଭାଜପା ସରକାର ଗଠନ ହେଉଛି।
କେନ୍ଦ୍ରମନ୍ତ୍ରୀ ଆହୁରି କହିଛନ୍ତି, ଯେତେବେଳେ କଂଗ୍ରେସ ସରକାର କେନ୍ଦ୍ରରେ ଥିଲେ, ସେମାନେ ଦଶ ବର୍ଷ ମଧ୍ୟରେ ରାଜସ୍ଥାନକୁ ୨ ଲକ୍ଷ କୋଟି ଟଙ୍କା ଦେଇଥିବାବେଳେ ୯ ବର୍ଷରେ ଭାଜପା ୮ ଲକ୍ଷ ୭୦ ହଜାର କୋଟି ଟଙ୍କା ଦେଇଥିଲା। ମୁଁ ରାଜସ୍ଥାନ ପରିଦର୍ଶନ କରିଛି। ଲୋକମାନଙ୍କ ଚିନ୍ତାଧାରା ପରଖିଛି। ଭାଜପା ୧ କୋଟିରୁ ଅଧିକ ଭୋଟରଙ୍କ ସହ ଯୋଗାଯୋଗ କରିଛି। ରାଜସ୍ଥାନ ସରକାର କରିଥିବା ଦୁର୍ନୀତିରେ ଜନସାଧାରଣ ଅସନ୍ତୁଷ୍ଟ। ତେଣୁ ଏଥର ଲୋକେ ଭାଜପାକୁ ଭୋଟ ଦେବାକୁ ଚାହୁଁଛନ୍ତି।