ଭୁବନେଶ୍ୱର,୧।୧୦ (ବ୍ୟୁରୋ): ରେଭେନ୍ଶା ବିଶ୍ୱବିଦ୍ୟାଳୟରେ ଆସନ୍ତା ୨୦ ତାରିଖରୁ ଦୁଇଦିନିଆ ୨୨ତମ ଓଡ଼ିଶା ବିଜ୍ଞାନ ଓ ପରିବେଶ କଂଗ୍ରେସ ଅନୁଷ୍ଠିତ ହେବ। ବିଶ୍ୱବିଦ୍ୟାଳୟ ଏବଂ ଓଡ଼ିଶା ପରିବେଶ ସମିତି ପକ୍ଷରୁ ଏହି ସମ୍ମିଳନୀ ଆୟୋଜନ ହେଉଥିବାବେଳେ ବିଷୟବସ୍ତୁ ରହିଛି ‘ସାମ୍ପ୍ରତିକ ଆହ୍ବାନଗୁଡ଼ିକୁ ଅତିକ୍ରମ କରିବାରେ ବିଜ୍ଞାନ ଓ ପ୍ରଯୁକ୍ତିବିଦ୍ୟାର ଭୂମିକା’। ବିଜ୍ଞାନର ବିବିଧ କ୍ଷେତ୍ରରେ ଘଟୁଥିବା ଅଗ୍ରଗତି ଏବଂ ଆମ ରାଜ୍ୟର ବିଜ୍ଞାନ ଗବେଷକଙ୍କ ଗବେଷଣା ଲବ୍ଧ ତଥ୍ୟ ଓ ସଫଳତା ବିଷୟରେ ଆଲୋଚନା କରି ନୂତନ ପିଢ଼ିକୁ ଦିଗ୍ଦର୍ଶନ ଦେବା ସହ ଉତ୍ସାହିତ କରିବା ଏହି ସମ୍ମିଳନୀର ପ୍ରମୁଖ ଆଭିମୁଖ୍ୟ ବୋଲି ବିଶ୍ୱବିଦ୍ୟାଳୟ ପକ୍ଷରୁ କୁହାଯାଇଛି।
ଏହି କଂଗ୍ରେସର ବିଭିନ୍ନ ଅଧିବେଶନରେ ବିଶିଷ୍ଟ ବୈଜ୍ଞାନିକମାନେ ଯୋଗଦେବେ। ବିଭିନ୍ନ ଗବେଷଣା କେନ୍ଦ୍ର ଓ ଉଚ୍ଚ ଶିକ୍ଷାନୁଷ୍ଠାନର ଗବେଷକ ଏବଂ ଛାତ୍ରୀଛାତ୍ର ମୌଖିକ ଓ ପୋଷ୍ଟର ମାଧ୍ୟମରେ ସେମାନଙ୍କ ସନ୍ଦର୍ଭ ଉଭୟ ଉପସ୍ଥାପନ କରିବେ। ଶ୍ରେଷ୍ଠ ସନ୍ଦର୍ଭ ଉପସ୍ଥାପନକାରୀଙ୍କୁ ମଧ୍ୟ ପୁରସ୍କାର ପ୍ରଦାନ କରାଯିବ। ସମ୍ମିଳନୀରେ ଗବେଷକ ଓ ଛାତ୍ରୀଛାତ୍ର ବହୁ ସଂଖ୍ୟାରେ ଯୋଗଦେବାକୁ ଆବାହକ ଡ. ଜୟକୃଷ୍ଣ ପାଣିଗ୍ରାହୀ ଓ ଆୟୋଜନ ସମ୍ପାଦକ ପ୍ରଫେସର ଲୁନା ସାମନ୍ତ ଅନୁରୋଧ କରିଛନ୍ତି।