![](https://www.dharitri.com/wp-content/uploads/2023/12/Election-3.jpg)
ହାଇଦ୍ରାବାଦ,୩।୧୨: ତେଲଙ୍ଗାନାର ୧୧୯ ବିଧାନସଭା ଆସନ ଲାଗି ରବିବାର ଭୋଟଗଣତି ଜାରି ରହିଛି। ମୁଖ୍ୟମନ୍ତ୍ରୀ କେସିଆର୍ ୨ ଆସନରେ ଭାଗ୍ୟ ପରୀକ୍ଷା କରୁଛନ୍ତି । ତାଜା ଆକଳନ ଅନୁଯାୟୀ ସେ ଗଜଓ୍ବେଲ ଆସନରେ ୩୦୨ ଭୋଟରେ ଆଗୁଆ ଅଛନ୍ତି। ହେଲେ କାମାରେଡିରେ ସେ ପଛରେ ଚାଲିଛନ୍ତି। ଏହି ଆସନରେ କେସିଆର୍ଙ୍କୁ କଂଗ୍ରେସର ରେବନ୍ତ ରେଡ୍ଡୀ କଡ଼ା ଟକ୍କର ଦେଇ ଆଗୁଆ ଚାଲିଛନ୍ତି।
ତେଲଙ୍ଗାନାରେ ଦଳଗୁଡ଼ିକୁ ବହୁମତ ଲାଗି ୬୦ ସିଟ୍ରେ ବିଜେତା ହେବା ଆବଶ୍ୟକତା ରହିଛି। ଏବେ କଂଗ୍ରେସ ୬୦ ସିଟ୍ରେ ଆଗୁଆ ଥିବାରୁ ରାଜ୍ୟରେ ଦଳ ଏକତରଫା ବିଜୟ ହାସଲ କରିପାରେ ବୋଲି ଅନୁମାନ କରାଯାଉଛି।
କହିରଖୁଛୁ, ରାଜସ୍ଥାନର ୧୯୯ ନିର୍ବାଚନମଣ୍ଡଳୀରେ ଭୋଟଗଣନା ହେଉଥିବା ବେଳେ ମଧ୍ୟପ୍ରଦେଶର ୨୩୦, ଛତିଶଗଡ଼ର ୯୦, ତେଲଙ୍ଗାନା ୧୧୯ ଆସନରେ ଭୋଟଗଣତି ହେଉଛି। ଗତ ୩୦ ତାରିଖରେ ତେଲଙ୍ଗାନା ଭୋଟଗ୍ରହଣ ଶେଷ ହେବା ପରେ ବିଭିନ୍ନ ଗଣମାଧ୍ୟମ ପକ୍ଷରୁ ବୁଥ୍ ଫେରନ୍ତା ଜନମତ ସର୍ଭେ ରିପୋର୍ଟ ପ୍ରକାଶ ପାଇଥିଲା। ଛତିଶଗଡ଼, ତେଲଙ୍ଗାନାରେ କଂଗ୍ରେସ ଏବଂ ମଧ୍ୟପ୍ରଦେଶ, ରାଜସ୍ଥାନରେ ଭାରତୀୟ ଜନତା ପାର୍ଟି(ଭାଜପା) ଜିତିପାରେ ବୋଲି ଅଧିକାଂଶ ଗଣମାଧ୍ୟମ ପ୍ରକାଶ କରିଥିଲେ। ସେହିଭଳି ମିଜୋରାମ ଭୋଟଗଣନା ୩ ପରିବର୍ତ୍ତେ ୪ ତାରିଖରେ କରିବା ଲାଗି ନିର୍ବାଚନ କମିଶନ ନିଷ୍ପତ୍ତି ନେଇଛନ୍ତି।