ନୂଆଦିଲ୍ଲୀ,୨୪ ।୯: କଂଗ୍ରେସ ଅଧ୍ୟକ୍ଷ ନିର୍ବାଚନ ଲାଗି ଶନିବାରଠାରୁ ପ୍ରାର୍ଥିପତ୍ର ଦାଖଲ ପ୍ରକ୍ରିୟା ଆରମ୍ଭ ହେବ । ବହୁ ପ୍ରତିକ୍ଷା ଓ ଟଣାଭିଡା ପରେ କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ ହେବାକୁ ଯାଉଛି । ବହୁ ବର୍ଷ ପରେ ଏମିତି ହେଉଛି ଯେ ଗାନ୍ଧୀ ପରିବାରର କୌଣସି ସଦସ୍ୟ ଏହି ନିର୍ବାଚନରେ ଭାଗ ନେଉ ନାହାନ୍ତି । ଅଧ୍ୟକ୍ଷ ପଦ ପାଇଁ ଦୁଇଟି ନାମ ଆଗରେ ଥିବା ବେଳେ ଏମାନେ ନିର୍ବାଚନ ଲଢିବା ଏକ ପ୍ରକାର ନିଶ୍ଚିତ ହୋଇଯାଇଛି ବୋଲି କୁହାଯାଉଛି । ତେବେ ୨-୩ ଦିନ ମଧ୍ୟରେ ସବୁ ସ୍ପଷ୍ଟ ହୋଇଯିବ । କିଏ ଅଧ୍ୟକ୍ଷ ପଦପାଇଁ ଦାବି କରିବେ ଓ କିଏ ଏଥିରେ ବାଜି ମାରିବେ ।
ଅଧ୍ୟକ୍ଷ ପଦ ପାଇଁ ପ୍ରାର୍ଥୀଙ୍କ କଥା ଆଲୋଚନା କଲେ ଏହି ରେସରେ ସବୁଠାରୁ ଆଗରେ ଦୁଇ ଜଣଙ୍କ ନାମ ରହିଛି । ସବୁଠୁ ଆଗରେ ଅଛନ୍ତି ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ । ଏମିତିବି ଗେହଲୋଟ କହିସାରିଛନ୍ତି ଯେ ପାର୍ଟି ହାଇକମାଣ୍ଡ ତାଙ୍କୁ ଯେଉଁ ଦାୟିତ୍ୱ ଦେବେ ତାକୁ ସେ ଗ୍ରହଣ କରିବେ । ଅନ୍ୟପଟେ ଏହି ରେସର ଦ୍ୱିତୀୟ ସ୍ଥାନରେ ରହିଛନ୍ତି ବରିଷ୍ଠ କଂଗ୍ରେସ ନେତା ଶଶି ଥରୁର । ସେ ଅଧ୍ୟକ୍ଷ ପ୍ରାର୍ଥ ହେବା ପଛରେ ଅନେକ କାରଣ ରହିଛି । ଏସବୁ ଭିତରେ ମନିଷ ତିୱାରୀ ବି ଅଧ୍ୟକ୍ଷ ପଦ ଲାଗି ପ୍ରାର୍ଥିପତ୍ର ଦାଖଲ କରିପାରନ୍ତି ବୋଲି କୁହାଯାଉଛି । ତେବେ ବେଶ କିଛି ବର୍ଷ ପରେ ଗାନ୍ଧୀ ପରିବାର ବାହାରୁ କେହି କଂଗ୍ରେସ ଅଧ୍ୟକ୍ଷ ପଦ ସମ୍ଭାଳିବାକୁ ଯାଉଥିବାରୁ ଏହାକୁ ନେଇ ଚର୍ଚ୍ଚା ଯୋର ଧରିଛି ।
