ନୂଆଦିଲ୍ଲୀ,୨୯ ।୯: କଂଗ୍ରେସ ଅଧ୍ୟକ୍ଷ ପଦକୁ ନେଇ ଏବେବି ସସପେନ୍ସ ଜାରି ରହିଛି । ବୁଧବାର ବିଳମ୍ବିତ ସନ୍ଧ୍ୟାରେ ରାଜସ୍ଥାନ ମୁଖ୍ୟମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ଅଶୋକ ଗେହଲୋଟ ନୂଆଦିଲ୍ଲୀ ପହଞ୍ଚିଛନ୍ତି । ସେ ଗୁରୁବାର ସୋନିଆ ଗାନ୍ଧୀଙ୍କୁ ଭେଟିବେ । ଅଧ୍ୟକ୍ଷ ପଦର ଦାବିଦାର କୁହାଯାଉଥିବା ଦିଗବିଜୟ ସିଂ ଏବେ ଦିଲ୍ଲୀରେ ଅଛନ୍ତି । କଂଗ୍ରେସ ଅଧ୍ୟକ୍ଷ ପଦ ପାଇଁ ପ୍ରାର୍ଥିପତ୍ର ଦାଖଲ କରିବାର ଶେଷ ତାରିଖ ୩୦ ସେପ୍ଟେମ୍ବର ରହିଛି । ହେଲେ ଏପର୍ଯ୍ୟନ୍ତ ସ୍ଥିର ହୋଇପାରୁନି କଂଗ୍ରେସ ଅଧ୍ୟକ୍ଷ କିଏ ହେବେ । ଏବେ ସମସ୍ତଙ୍କ ନଜର କଂଗ୍ରେସର ଅସ୍ଥାୟୀ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଉପରେ । ଆଶୋକ ଗେହଲୋଟଙ୍କୁ ନେଇ ସମସ୍ତ କଳ୍ପନା ସେତେବେଳେ ଓଲଟ ପାଲଟ ହୋଇଗଲା ଯେତେବେଳେ ରାଜସ୍ଥାନର ୮୨ ବିଧାୟକ ସଚ୍ଚିନ ପାଇଲଟଙ୍କୁ ମୁଖ୍ୟମନ୍ତ୍ରୀ ନ କରିବାକୁ ସ୍ପିକରଙ୍କ ନିକଟରେ ନିଜ ନିଜର ଇସ୍ତଫା ପ୍ରଦାନ କଲେ । ଏବେ ସୋନିଆ ଗାନ୍ଧୀଙ୍କ ନିଷ୍ପତ୍ତି ଅନୁଯାୟୀ, ଗେହଲୋଟ କଂଗ୍ରେସ ଅଧ୍ୟକ୍ଷ ହେବେ କି ନା ତାହା ସ୍ପଷ୍ଟ ହେବ । ଏପଟେ ପ୍ରିୟଙ୍କା ଗାନ୍ଧୀଙ୍କୁ ଅଧ୍ୟକ୍ଷ ପଦ ଦେବାକୁ କଥା ଉଠିଲାଣି ।
