ନୂଆଦିଲ୍ଲୀ,୭ ।୧୦: କଂଗ୍ରେସ ନେତା ଶଶି ଥରୁର ଅଧ୍ୟକ୍ଷ ପଦ ନିର୍ବାଚନ ପାଇଁ ଯୋରସୋରରେ ଅଭିଯାନ ଆରମ୍ଭ କରିଛନ୍ତି । କେରଳ, ତାମିଲନାଡୁ ସମେତ ଅନ୍ୟରାଜ୍ୟ ଗସ୍ତ କରି କର୍ମକର୍ତ୍ତାଙ୍କଠାରୁ ତାଙ୍କ ସମର୍ଥନ ମାଗି ସାରିଛନ୍ତି । ଅନ୍ୟପଟେ ଥରୁର ଅଧ୍ୟକ୍ଷ ପଦ ଦୌଡରୁ ବାହାରି ଯାଇ ପାରନ୍ତି ବୋଲି ବି ଶୁଣିବାକୁ ମିଳୁଛି । ଇତିମଧ୍ୟରେ ସେ ନିର୍ବାଚନ ଘୋଷଣାପତ୍ର ଜାରି କରିଛନ୍ତି । ଯେଉଁଥିରେ ସେ ଯୁବବର୍ଗ, ମହିଳା ଓ ଦଳର କର୍ମୀଙ୍କୁ ସଶକ୍ତ କରିବାକୁ ଧ୍ୟାନଦେବେ ବୋଲି କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି କଂଗ୍ରେସ ୨୦୨୪ ସାଧାରଣ ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଭାରତୀୟ ଜନତା ପାର୍ଟିି(ଭାଜପା) ସହ ଲଢିବାକୁ ରାଜନୈତିକ ସ୍ତରରେ ସଶକ୍ତ କରିବ । ଏହାସହ ସେ କହିଛନ୍ତି ଦଳର ବରିଷ୍ଠ ନେତା ମଲ୍ଲିକାର୍ଜୁନ ଖଡଗେଙ୍କୁ ସେ ସମ୍ମାନ କରନ୍ତି । ଏହି ମୁକାବିଲା କେବଳ ଭାଜପାକୁ ସାମ୍ନା କରିବାକୁ ।
ଥରୁର କହିଛନ୍ତି ଆମେ ଦଳର କାର୍ଯ୍ୟରେ ସୁଧାର ଆଣିବା ଜରୁରୀ । ଆମକୁ ଯୁବବର୍ଗଙ୍କୁ ଦଳରେ ସାମିଲ କରି ସେମାନଙ୍କୁ ପ୍ରକୃତ ଅଧିକାର ଦେବା ଆବଶ୍ୟକ । ଏହାସହ ଯେଉଁକର୍ମୀ ପରିଶ୍ରମି ଓ ଲମ୍ବା ସମୟ ପର୍ଯ୍ୟନ୍ତ କାର୍ଯ୍ୟକରିବେ ସେମାନଙ୍କୁ ଅଧିକ ସମ୍ମାନ ଦେବା ଦରକାର । ପୁଣି ବୁଥ ସ୍ତରରେ ପାର୍ଟି କାର୍ଯ୍ୟକରିବା ସହ ମହାସଚିବଙ୍କୁ ଠିକ ଭାବେ ଉପଯୋଗ କରିବା ଦରକାର । ଥରୁରଙ୍କ ଘୋଷଣା ପତ୍ରରେ ୧୦ଟି ପଏଣ୍ଟ ଉପରେ ଧ୍ୟାନ ଦିଆଯାଇଛି । ଏହା ପୂର୍ବରୁ ଘୋଷଣାପତ୍ରରେ ଥିବା ଭାରତର ମାନଚିତ୍ରକୁ ନେଇ ବିବାଦ ଉପୁଜିବା ପରେ ଥରୁର ଏହାବୁ ବଦଳାଇ ଦ୍ୱିତୀୟ ମାନଚିତ୍ର ଲଗାଇଛନ୍ତି ।