ନୂଆଦିଲ୍ଲୀ,୨୪ ।୯: କଂଗ୍ରେସକୁ ଆଉ ଅଳ୍ପଦିନ ମଧ୍ୟରେ ନୂଆ ଅଧ୍ୟକ୍ଷ ମିଳିଯିବ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଏଥର ଅଧ୍ୟକ୍ଷ ପଦ ଗାନ୍ଧୀ ପରିବାରରୁ ନୁହେଁ ବରଂ ବାହାରର କେହି ଜଣେ ନେତା କଂଗ୍ରେସର ଅଧ୍ୟକ୍ଷ ହେବାକୁ ଯାଉଛନ୍ତି । ଏହି ରେସ୍ରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କ ନାମ ସବୁଠାରୁ ଆଗରେ ଥିବା ବେଳେ କେତେଜଣ ନେତା କିନ୍ତୁ ରାହୁଲ ପୁଣିଥରେ ଅଧ୍ୟକ୍ଷ ହୁଅନ୍ତୁ ବୋଲି ଚାହୁଁଛନ୍ତି । କିନ୍ତୁ ଗେହଲୋଟ କହିଛନ୍ତି ପୂର୍ବରୁ ରାହୁଲ ଗାନ୍ଧୀ ସ୍ପଷ୍ଟ କରିଛନ୍ତି ଯେ ସେ ଏଥର ଅଧ୍ୟକ୍ଷ ପଦ ସମ୍ଭାଳିବେ ନାହିଁ କି ନିର୍ବାଚନରେ ଭାଗ ନେବେ ନାହିଁ । ତେବେ ୨୦୧୯ ଲୋକ ସଭା ନିର୍ବାଚନରେ ହାରିବା ପରେ ରାହୁଲ ସଙ୍କେତ ଦେଇଥିଲେ କି ଆଗକୁ ଗାନ୍ଧୀ ପରିବାରର କୌଣସି ସଦସ୍ୟ କଂଗ୍ରେସର ଅଧ୍ୟକ୍ଷ ହେବେ ନାହିଁ ।
ସୂଚନାଯୋଗ୍ୟ, ୨୦୧୯ରେ ହୋଇଥିବା ଲୋକସଭା ନିର୍ବାଚନରେ କଂଗ୍ରେସକୁ ବଡ ପରାଜୟର ସାମ୍ନା କରିବାକୁ ପଡିଥିଲା । ସେତେବେଳେ ଅଧ୍ୟକ୍ଷ ପଦରେ ଥିବା ରାହୁଲ ଗାନ୍ଧୀ ପରାଜୟ ପାଇଁ ନିଜକୁ ଦାୟୀ କରି ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ । ଇସ୍ତଫା ଦେବା ବେଳେ ସେ କହିଥିଲେ କି କଂଗ୍ରେସର ପରବର୍ତ୍ତି ଅଧ୍ୟକ୍ଷ ଗାନ୍ଧୀ ପରିବାର ବାହାରୁ ହେବେ । ଏବେ ଭାରତ ଯୋଡୋ ଯାତ୍ରାରେ ଥିବା ରାହୁଲ କହିଛନ୍ତି ମୁଁ ମୋ ପୁରୁଣା କଥାକୁ ରଖିବାକୁ ଚାହୁଁଛି । ଅର୍ଥାତ୍ ଏଥର କଂଗ୍ରେସ ଅଧ୍ୟକ୍ଷ ପଦରେ ଗାନ୍ଧୀ ପରିବାରର କୌଣସି ସଦସ୍ୟ ରହିବେ ନାହିଁ ।
