ନୂଆଦିଲ୍ଲୀ,୧୭।୭ : ସୋମବାରଠାରୁ ଆରମ୍ଭ ହେବାକୁ ଥିବା ସଂସଦର ମୌସୁମୀ ଅଧିବେଶନ ପୂର୍ବରୁ ସରକାରଙ୍କ ପକ୍ଷରୁ ରବିବାର ଏକ ସର୍ବଦଳୀୟ ବୈଠକ ଡକାଯାଇଥିଲା। ଏହି ବୈଠକରେ ସରକାରଙ୍କ ପକ୍ଷରୁ କେନ୍ଦ୍ର ମନ୍ତ୍ରୀ ରାଜନାଥ ସିଂ, ରାଜ୍ୟ ସଭା ଭାଜପା ନେତା ପୀୟୁଷ ଗୋୟଲ ଏବଂ କେନ୍ଦ୍ରୀୟ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ପ୍ରତିନିଧିତ୍ୱ କରିଥିଲେ।
ବୈଠକରେ ଦଳର ବହୁ ବଡ ନେତା ଏବଂ ବିରୋଧୀ ସଳ ନେତା ଉପସ୍ଥିତ ଥିଲେ। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ବୈଠକରେ ଯୋଗଦେଇ ନ ଥିଲେ। ପ୍ରଧାନମନ୍ତ୍ରୀ ମୋଦିଙ୍କ ଅନୁପସ୍ଥିତିକୁ ନେଇ କଂଗ୍ରେସ ପ୍ରଶ୍ନ ଉଠାଇଛି।
ସଂସଦର ଆଗାମୀ ଅଧିବେଶନ ଉପରେ ଆଲୋଚନା ପାଇଁ ସର୍ବଦଳୀୟ ବୈଠକରେ ପୂର୍ବପରି ପ୍ରଧାନମନ୍ତ୍ରୀ ଅନୁପସ୍ଥିତ ଅଛନ୍ତି। ଏହା ଅସାମ୍ବିଧାନିକ’ନୁହେଁ କି? ବୋଲି କଂଗ୍ରେସ ନେତା ଜୟରାମ ରମେଶ ଟୁଇଟ କରି କହିଛନ୍ତି। ବୈଠକରେ କଂଗ୍ରେସର ମଲ୍ଲିକାର୍ଜୁନ ଖାର୍ଗେ, ଅଧୀର ରଞ୍ଜନ ଚୌଧୁରୀ, ଜୟରାମ ରମେଶ, ଡିଏମକେର ଟିଆର ବାଲୁ ଏବଂ ତିରୁଚି ସିଭା, ଟିଏମସିର ସୁଦୀପ ବନ୍ଦୋପାଧ୍ୟାୟ ଏବଂ ଏନସିପିର ଶରଦ ପାୱାରଙ୍କ ସମେତ ପ୍ରାୟ ସମସ୍ତ ଦଳର ନେତା ଉପସ୍ଥିତ ଥିଲେ। ଏହା ବ୍ୟତୀତ ବିଜେଡିର ପିନାକି ମିଶ୍ର, ଓ୍ବାଇଏସଆରସିପିର ବିଜୟସାଇ ରେଡ୍ଡୀ, ମିଡୁନ ରେଡ୍ଡୀ, ଟିଆରଏସର କେଶବ ରାଓ ଏବଂ ନାମା ନାଗେଶ୍ୱରା ରାଓ, ଆରଜେଡିର ଏଡି ସିଂ ଏବଂ ଶିବସେନାର ସଞ୍ଜୟ ରାଉତ ମଧ୍ୟ ଉପସ୍ଥିତ ଥିଲେ।
ସଂସଦର ମୌସୁମୀ ଅଧିବେଶନ ଜୁଲାଇ ୧୮ ରୁ ଆରମ୍ଭ ହୋଇ ଅଗଷ୍ଟ ୧୨ ରେ ଶେଷ ହେବ।