ନୂଆଦିଲ୍ଲୀ, ୧୦ା୪(ପି.ଟି.): ଚାଇନା ସହ ସମ୍ପୃକ୍ତି ଥିବା ଆଦାନୀ ଗ୍ରୁପ୍କୁ ଭାରତରେ ବନ୍ଦର ପରିଚାଳନା ଅନୁମତି ଦିଆଯାଇଥିବାରୁ ଏହା ଉପରେ କଂଗ୍ରେସ ରବିବାର ପ୍ରଶ୍ନ ଉଠାଇଛି। କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ଏକ ଗଣମାଧ୍ୟମ ରିପୋର୍ଟ ଦେଖାଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ଉକ୍ତ ରିପୋର୍ଟ ଅନୁଯାୟୀ, ଚାଇନା ଫାର୍ମ ସହ ତାଇଓ୍ବାନର ଓ୍ବାନ୍ ହାଇ ନିର୍ଦ୍ଦେଶକଙ୍କ ସମ୍ପର୍କ ଥିବା ଜଣାପଡ଼ିବା ପlରେ ୨୦୨୨ରେ ସରକାର ଏପିଏମ୍ ଟର୍ମିନାଲ୍ସ ମ୍ୟାନେଜମେଣ୍ଟ କନ୍ସୋର୍ଟିୟମ ଏବଂ ଓ୍ବାନ ହାଇ ଲାଇନ୍ସକୁ ସୁରକ୍ଷା ମଞ୍ଜୁରୀ ଦେବାକୁ ମନା କରିଦେଇଥିଲେ।
ଫଳରେ ଉକ୍ତ କନ୍ସୋର୍ଟିୟମ୍ର ଜବାହରଲାଲ ନେହେରୁ ପୋର୍ଟ କର୍ତ୍ତୃପକ୍ଷ ଟର୍ମିନାଲରେ କଣ୍ଟେନର ପରିଚାଳନା ବନ୍ଦ ହୋଇଯାଇଥିଲା। ଚାଇନା କମ୍ପାନୀ ଏବଂ ଚାଇନା ସହ ସମ୍ପୃକ୍ତ ଥିବା ସଂସ୍ଥାକୁ ଭାରତର ବନ୍ଦର ଓ ଟର୍ମିନାଲରେ କାର୍ଯ୍ୟ କରିବାକୁ ନ ଦେବା ସରକାରଙ୍କ ନୀତି ବୋଲି ଏଥିରୁ ସ୍ପଷ୍ଟ ହୋଇଛି। ତେବେ ଆଦାନୀ ଗ୍ରୁପ୍ର ଚାଇନା ଲିଙ୍କ୍ ସତ୍ତ୍ୱେ ଏହାକୁ ବନ୍ଦର ପରିଚାଳନା ଅନୁମତି ଦିଆଯିବା ପ୍ରଶ୍ନବାଚୀ ସୃଷ୍ଟି କରିଛି ବୋଲି ଜୟରାମ କହିଛନ୍ତି। ଚାଇନା ନାଗରିକ ଚାଙ୍ଗ୍ା ଚୁଙ୍ଗ-ଲିଙ୍ଗ୍ ଆଦାନୀ ଗ୍ରୁପ୍ ସହ ଘନିଷ୍ଠ ଭାବେ ଜଡ଼ିତ ବୋଲି କଂଗ୍ରେସ ବାରମ୍ବାର ଅଭିଯୋଗ କରିଆସୁଛି। ଆଦାନୀ ଗ୍ରୁପ୍ର ବିଭିନ୍ନ ବନ୍ଦର, ଟର୍ମିନାଲ, ରେଳ ଲାଇନ ଓ ଅନ୍ୟାନ୍ୟ ଭିତ୍ତିଭୂମି ନିର୍ମାଣ କରିଥିବା ପିଏମ୍ସି ପ୍ରୋଜେକ୍ଟର ମାଲିକ ହେଉଛନ୍ତି ଚାଙ୍ଗ୍ଙ୍କ ପୁଅ। ଆଦାନୀ ଗ୍ରୁପ୍ ଏବଂ ପିଏମ୍ସି ୫,୫୦୦ କୋଟି ଟଙ୍କାର ବିଦ୍ୟୁତ୍ ଉପକରଣ ଓଭର-ଇନ୍ଭଏସିଂ ଦୁର୍ନୀତିରେ ସମ୍ପୃକ୍ତ ବୋଲି ରାଜସ୍ବ ଗୋଇନ୍ଦା ନିର୍ଦ୍ଦେଶାଳୟ ଅଭିଯୋଗ ଆଣିଥିବା ଜୟରାମ କହିଛନ୍ତି।