ନୂଆଦିଲ୍ଲୀ,୫ ।୧୧: ଗୁଜରାଟ ବିଧାନସଭା ନିର୍ବାଚନକୁ ନେଇ ଏକ ବଡ ଖବର ସାମ୍ନାକୁ ଆସିଛି । ଗୁଜରାଟ ନିର୍ବାଚନ ପାଇଁ କଂଗ୍ରେସ ୪୩ଟି ଆସନ ଲାଗି ପ୍ରାର୍ଥୀଙ୍କ ନାମ ଘୋଷଣା କରିଛି । ଏହି ତାଲିକାରେ ଚର୍ଚ୍ଚିତ ନାମ ମଧ୍ୟରେ ପୋରବନ୍ଦରରୁ ଅର୍ଜୁନ ମୋଦୱାଡିୟା ଓ ଘଟଲୋହିୟାରୁ ଅମି ୟାଗ୍ନିଙ୍କୁ ଟିକେଟ ଦିଆଯାଇଛି ।
ଗୁଜରାଟ ବିଧାନସଭା ବିଗୁଲ ବାଜି ସାରିଛି । ଏହାପରଠାରୁ ସମସ୍ତ ଦଳ ସେମାନଙ୍କ ପ୍ରାର୍ଥିଙ୍କ ନାମ ଚୁଡାନ୍ତ କରିବାରେ ଲାଗିପଡିଛନ୍ତି । ୨୭ ବର୍ଷ ହେବ ଗୁଜରାଟରେ ଶାସନ କ୍ଷମତାରେ ଥିବା ଭାରତୀୟ ଜନତା ପାର୍ଟି(ଭାଜପା) ଏଥର ପୁଣି ବିଜୟ ଲକ୍ଷ୍ୟରେ ଥିବା ବେଳେ କଂଗ୍ରେସ ବି ଶାସନ କ୍ଷମତାକୁ ଫେରିବାକୁ ନେଇ ଆଶ୍ୱସ୍ତ ଥିବା ଦେଖାଯାଇଛି । ସେପଟେ ଅରବିନ୍ଦ କେଜରିୱାଲଙ୍କ ଦଳ ଆମ ଆଦମୀ ପାର୍ଟି(ଏଏପି) ବି ଗୁଜରାଟର ରାଜନୀତିରେ ନିଜର ବଳ କଷିବାକୁ ବାହାରି ପଡିଛି ।
ସୂଚନାଯୋଗ୍ୟ, ଶୁକ୍ରବାର କଂଗ୍ରେସ ନିର୍ବାଚନ ସମିତିର ବୈଠକ ହୋଇଥିଲା ଯେଉଁଥିରେ କଂଗ୍ରେସ ଗୁଜରାଟ ନିର୍ବାଚନ ଲାଗି ସମ୍ଭାବ୍ୟ ପ୍ରାର୍ଥିଙ୍କ ନାମକୁ ନେଇ ମନ୍ଥନ କରିଥିଲା । ଏହାପରେ ଦଳ ୪୩ ଜଣ ପ୍ରାର୍ଥିଙ୍କର ପ୍ରଥମ ତାଲିକା ପ୍ରକାଶ କରିଥିଲା । ଗୁଜରାଟ ନିର୍ବାଚନକୁ ନେଇ ଏହା ସିଇସିର ଦ୍ୱିତୀୟ ବୈଠକ ଥିଲା । ଏଥିରେ ୭୦-୮୦ ଜଣ ପ୍ରାର୍ଥିଙ୍କ ନାମରେ ମୋହର ଲାଗିଥିବା କୁହାଯାଉଛି । ଏହା ପୂର୍ବରୁ କଂଗ୍ରେସର ସିଇସି ବୈଠକରେ ୧୧୦ ଜଣ ପ୍ରାର୍ଥିଙ୍କ ନାମରେ ମୋହର ବାଜିଥିଲା ।
ଗୁଜରାଟ ବିଧାନସଭାରେ ମୋଟ ୧୮୨ ଆସନ ରହିଛି । ୨୦୧୭ରେ ବିଧାନସଭା ନିର୍ବାଚନରେ ଭାଜପା ୯୯ ଆସନରେ ବିଜୟୀ ହୋଇ ଲଗାତାର ୬ଷ୍ଠ ଥର ଲାଗି ଶାସନ କ୍ଷମତା ହାତେଇଥିଲା । ଏପଟେ କଂଗ୍ରେସକୁ ମିଳିଥିଲା ୭୭ ଆସନ । ଏଥର ୧୮୨ ଆସନ ବିଶିଷ୍ଟ ଗୁଜରାଟ ବିଧାନସଭା ନିର୍ବାଚନ ଦୁଇଟି ପର୍ଯ୍ୟାୟରେ ହେବ । ଡିସେମ୍ବର ୧ ଓ ୫ରେ ଭୋଟ ଗ୍ରହଣ କରାଯିବା ସହ ଡିସେମ୍ବର ୮ରେ ଫଳାଫଳ ଘୋଷଣା କରାଯିବ ।